Ely wul Muhammed Faal, hokkii jumaa « Sankore » to Tummbuktu, leydi Mali 38 miliyoŋ Faraa (38 000 000 F) ngam siftinde wonde wuro ngoon ɗoon meeɗii moolde taaniraaɓe makko safalɓe dogatnooɓe njanguuji laamɓe katolik en e teeminanɗe 13 e 15 (wonii jooni duuɓi 700 hitaande). Ɓeen laamɓe katolik en keptiino nokku biyateeɗo Kordu (Cordoue, to Espaañ) e hitaande 1236, kam e Gerenaad (Grenade) e hakkunde 1492 e 1493. Jumaa Sankore mahaa ko e teeminanɗe 14 e 15.
O jeyaa ko e mahaaɗe ɓurɗe faayodinde ɗe laamɓe ndeen mahi. Duɗal jumaa o nawdetee ko e duɗe Keer (Caire) e Kordu (Cordoue), Fees (Fèz) kam e mo Damaas (Damas). Annduɓe e yimiyankooɓe safalɓe heewɓe njanngii ɗoon. Ɗum na jeyaa e ko hokkunoo Tummbuktu daraja mawɗo, waɗti ɗum nokku pinal e ganndal. Ely huninoo ngal- ɗoo dokkal ngam wallitde peewnitgol e kisnugol jumaa o, ko e hitaande 2006 to Tummbuktu nde o yahi toon tawtoroyeede Mawluud.
