Ko ko woyi maayɓe koo manata wuurɓe…
Ñalnde 05 Lewru Mai (Mee) 2018, Fedde Yaakaare Yonta men yuɓɓɓinii kikiiɗe pinal to Hotel Azalaï mo Nuwaaasooɗ, ɓurnooɗo lollirde Hotel Marhaba walla ko sakkitii koo Hotel Mercure. Ciftinen fedde ndee jibinaa koko ɓooyaani kono ene waawi limtideede e pelle mawɗe sabu ko nde waɗi ɗoo koo weeɓaani. Keewno ɗen waɗde jeewte ko e dingire walla e galleeji sukaaɓe, kono e nder Hotel kam heewaani.
Kono wonaa ɗuum njiɗ ɗen haalde hannde. Njiɗ ɗen haalde ko ko waɗaa toon koo. Waɗaa toon ko yeewtere nde tiitoonde mum woni moɗ-pinalaagu. Yeewtatnoo ko Ibiraahiima Saar, mo darnde mum teskaa e pinal no feewi. Hay sinno hannde, o ɓuri lollirde ko dawriyanke ne haɗataa laataade mo jaalal pinal ngal wayɓe no am fof keewi tuugnaade e golle mum.
Kono ko adii yeewtere makko ndee, goɗɗum haalaama toon. Ene heen, siimtude nguurndam yoga e yimɓe leñol fulɓe teskoraaɓe darnde mumen mawnde, gam suusnude sukaaɓe haa ngona nafooɓe leñol, nafooɓe ngenndi mumen. Ene e ɓe haala mumen haalaa toon :
Jibi Hammee Lih, jannginoowo, koroowo jaŋde, wiɗtiyanke, winndiyanke, yeewtiyanke ko aldaa e naamnal. Dooro Gey siimtanii tawtoranooɓe ɓee fof, nguurndam oo gorko duɗtiiɗo e Joom mum tawi leñol ene woɗɗi dakmitaade e golle mum.
Rewi heen ko Doktoor Saydu Kan. Kanum ne ko jannginoowo, wiɗtiyanke, daartolyanke, renndoyanke, yeewtiyanke, golliiɗo ko heewi, ko nafata mo meeɗaani dartinde golle ɓamtooje pinal e renndo haa ruɗtii e Joom mum. Siley Jaw (Fuutanke) yaajniima no feewi e ko o gollii gila o jibinaa haa ɗo Alla haaɗni ɗoo. Eɗen njanta e duwinooɓe ñalnde heen, ngam wiyde yoo Alla yurmo ɓe yaafoo ɓe, waɗa Nulaaɗo Njaatigi maɓɓe.
Pulaar noon ene wiya, «ko ko woyi maayɗo koo manti guurɗo». Sikke alaa noon, keew ɗen nande ene mantee tan ko jahɗo haa wirnii gite. Fedde Yaakaare Yonta men yantii e saliiɓe ɗuum, mbiyi yoo neɗɗo mante gila ene wuuri, mbele ene ɓeyda, so woɗɓe nanii ñemmba. Ko ɗuum waɗi ɓe ɗaɓɓiri Ami Saydu Baaraan Bah nde yeewtanta ɓe ko yowitiinde e nguurnam Ndunngu Sala Bah, Cafroowo, golliiɗo, gollini ɓe ngalaano golle tawi ko laatinooɓe yaakaare jinnaaɓe, haa ndañi ko ñamminiri njarniri ɓesnguuji, keɓi duwaawu neene e baaba. O rewni heen ko Mayram Bah, teskoraaɗo darnde mum ngam yooltude hujjaaji rewɓe. ko caggal ɗuum mawɗo Ibiraahiima Saar ƴefti konngol ngam yeewtude ko fayti e moɗ-pinalaagu.
Ko adii nde eɗen paya e yeewtere ndee, ciftinen tan sosɓe ndee ɗoo fedde ko e watsap tan njeewtidatnoo haa jibini ɗum ɗoo. Ɗum noon ene siftina en jeewte mbaɗno ɗen paytuɗe e ɗee kuutorɗe kese (watsap, facebook, imo, wiber, ekn…). Kuutorɗe baawɗe bonnude walla moƴƴinde fawaade e no kuutorirto ɗen ɗum. Maa en ngartu e yloowdi yeewtere Ibiraahiima Saar yeewtunoo roon, kono ko adii ɗum, eɗen nduwoo « Yoo Alla hebbin jogiiɓe hono ɗii miijooji e fewjooɓe hono ɗee peeje ».
Malal Sammba GISE
