Hakkillaaji keewɗi ine njowii hannde he kaaldigal daatteteengal ngal, ko ina wona jooni duuɓi ɗiɗi.
Hol ko woni luural hakkunde goongɗinɓe ngol laawol e saliiɓe dum ? Eɗen ndokka heen miijo men, eto-ɗen jiiɓtude e seerndude hakkunde ko laaɓti heen e ko furɗi heen koo.
Ko adii fof, ngannden haala kaa wonaa mate kaaldigal ina moƴƴi walla moƴƴaani, walla mbele ina moti walla motaani. Hay gooto salaaki diisnondiral, no waawi siforaade kala. Ɗuum, waɗii, waɗtii. Soklaani ruttanaade. Njiɗ-ɗen hannde ko anndude hol ko ngalɗoo diisnondiral walla kaaldigal soomi, hol ko addi ngal, hol ko ɗaminaa he maggal ?
Caggal pooɗondial ngam ardaade leydi hitaande 2019, Ghaswaani nawii raay, muritaninaaɓe cuɓii mo, fawaade he ko o huninoo, so safrude caɗeele leydi ndii. Darnde luulndo fotnoo wonde ko rewindaade golle makko, teskoo so omo waɗa ko o wiynoo, heptina ko moƴƴi he golle makko, ñiŋa, saloo kala ko boni he golle makko, ko nafataa ɓesngu nguu. So laatiima o waawanaa ko o tottaa koo, luundo yahda he ɓesngu haɓaade laamu makko tawa ko hare laaɓtunde fawiindi he laawol demokarasii. So wulii haa doole ɗeɓii yerondirde, so ngar-mi ngaraa yettiima he nokku mo hay gooto waawaa farlinde he goɗɗo oo ko welaa, doole tehondirii, ko he oon sahaa kaaldigal (dialogue) noddetee, yonti, feere wonde alaa. Yimɓe njooɗoo, kaalda, nanondira he maslahaa, ciyna golle mum en. He miijo am, Moritani wonaani he ngoon weeyo hannde. Laamu haljaani, luulndo dillaani. Ɗum waɗi mawɗo leydi ndii wiyde ngalɗoo kaaldigal motaani. O haalii goonga.
Ko Tuubakooɓe mbiyata « concertation » (diisnondiral) koo, ɗum nii ko huunde winndaande, fotnde duumaade hakkunde Hooreejo Njuɓɓudi Luulndo Demokaraasi (Institution de l’Opposition Democratique) e mawɗo leydi ndii. Ɗum ɓuri heewde ko he sahaa mo Persidaa yiɗi (foti) habrude won ko joli, nodda diisnondiral ngam yimɓe fof ndaroo, kuccana ɗum. Ko wayi no diisnondiral baɗanoongal he laamu Siidi Seek Abdallaahi, ko wayi no leydi yanaama, walla won he jaahiyaaji mawɗi, toɓooji bonɗi, walla « pandémie du Covid », ekn.
Kaaldigal politik (Dialogue politique) e Diisnondiral (Concertation) wonaa gootum, jiydaa ciirol. Jiiɓata haqqillaaji yimɓe ko wiyde ina mawnina ko mawnaani, ina fayna ko fayaani. Hol faandaare mum, miin dey mi fahmaani. Fellitɓe yahde he yeewtere wiyeteende ndee, alaa ko bonnata, yo njah. Ɓe paamaani, ngoongɗinaani ɓee mbiya « yo Allah wallu », ɗo toɓo iwri fof yo yuus. Kono wonaa mawɗo yiɗii ñaamde mooloturu tan wiya: KO ƊUM WONI COLAL. Concertation ina wona he sahaa kala, kono hannde oo, kaaldigal (dialogue) woodaani, tee jojjaani.
Jibi Bekkaay Sih
