Yo Alla daɗndu Senegaal.Waɗi noon, ko gila Abdullaay Wad wiyi ina birga laamu tataɓol, Senegaalnaaɓe heewɓe ko saliiɓe, mbiyi ina potndi heen huunde fof, sibu e miijo maɓɓe, Doosde leydi Senegaal ndokkaani hay gooto waɗde manndaaji tati. Abdullaay Wad noon wiyi wonde oon sariya hiisaaki manndaa mum gadano oo, sibu о ƴettaa ko caggal nde o toɗɗaa gadanol, e hitaande 2001, nde njuuteendi manndaa artiranoo e duuɓi joy.
Kono luulndiiɓe ɗum ɓee njаɓааni sibu, e wiyde maɓbe, oon sariya ari ko tawi o joofnaani manndaa gadano oo, ɗum noon, oon ina foti limeede heen.Wonande woɗɓe, ko Abdullaay Wad mawnii, sibu omo yahra hikka e duuɓi 86, tee, nde o toɗɗaa ɗiɗmol ndee, o waylii kadi doosɗe leydi ndii, o artiri njuuteendi manndaa e duuɓi 7 (no waynoo adan nii). Ɗum noon, so tawii o toɗɗitaama hikka, so Alla duliima mo, ma o dañ duuɓі 93 omo woni e laamu. E ko wattindii koo nii, o wiyi, kanko Laay Wad, wonde omo waawi gaa wonde kanndidaa hay e 2019, wonaa tan hay 2012 !
O yahii haa o noddi tuubakooɓe annduɓe sariya, ngari Senegaal, ceedtii wonde omo waawi birgude laamu hikka. Ina gasa noon tawa ɓeydi Senegaalnaaɓe añtude Abdullaay Wad, ko alaa feere nde o waɗaani ngam yo ɓiyiiko lomto mo e laamu. Kono peeje ɗe o ƴettunoo kala, njuumtaani. Feere nde o wattindii ƴettude ko wiyde omo naatna mbayliigu e doosɗe leydi, tawa ko yimɓe ɗiɗo toɗdidtee e gardagol leydi Senegaal, hono mawɗo leydi e cukko mum, tawa kadi soklaani ko ɓeen ina keɓa keeweendi 50%, kono nayaɓal tan (25%). Oon sahaa, eɗen ciftora Senegaalnaaɓe laawii, nduppi Ndakaaru, Abdullaay Wad yahtiri caggal.
Jooni ne, ko Diiso doosɗe jaɓi kanndidatiir makko koo, Ndakaaru ɗaanaaki jamma aljumaa jofi aset 28/01/2012, pelɓondire bonɗe mbaɗii e wuro hee, haa woodi polisee maayi heen. Ina jeyaa e pelle caasɗe e luulndiiɗe kanndidatiir tataɓo Wad, fedde wiyeteende M23 renndinnde pelle politik e pelle renndo e jaambureeɓе. Laamu Wad ne yolbinaani, sibu Wad e hoore mum wiyi ko gullittooɗo mbele kanndidatiiraaji Gaajo e Idriisa Sek e Makki Sal, potaani jaɓeede, sibu ɓeen kuuɓnaani ko fawii e mum en to bannge njoɓdi lempоo. Kono ellee ɗum na ɗeɓi fenngiɗde, sibu ellee o suɓtii ko ɓe o huli ina mbaawi dartaade mо ɓее. Ko waawnoo heen wonde fof, Senegaal naatii caɗeele, ko Alla tan anndi ɗo yiɗde laamu jogori faarude ndii leydi.
Yo Alla baddinan Senegaal, ɓurɗo hedde e mawngu oo waajtoo hoore mum, waɗa no Senngoor e Abdu Juuf mbaɗnoo nii, so woppirde teddungal, gila woppinaaka e gacce.
Diiso doosɗe riiwtii kanndidatiir Yuusu Nduur, kono, Yuusu wiyi wonde ɗum alaa daliilu, ma a taw Wad ko kulɗo mo.
Bookara Aamadu Bah
