Sukaaɓe sanɗaaji fulɓe janngooɓe to duɗal jaaɓi haaɗtirde Gaston Berger, to Ndar, Senegaal, ina njogii fedde renndinnde Fulɓe duɗal ngal : Senegaalnaaɓe, Muritaninaaɓe, Malinaaɓe, Ginenaaɓe ekn. Hikka kadi ardinaa dental ngal ko ɓiɗɗo debbo biyeteeɗo Mintu Muusaa Koreera, sanɗa Muritaninaajo janngoowo ko fayti e ganndal hiisa tabitinaaɗo e Ganndal renndo. Hikka noon ko ñalnde 21 mars ɓe puɗɗii tabitinde tuugnorgal maɓɓe golle hitaande 2009-2010. Ɓe njuɓɓinani ɗum ko hiirde mawnde gaaci e jime e ngamri Pulaagu to restoraa Le Virage. Tiitoonde ñalngu ngu ko “ mawninde Pulaar ”.
Fedde sukaaɓe iwdi Fuuta (AERF) tawtoraama hiirde nde. Kowri Woon, gardiiɗo ngaal ɗoon dental wiyi wonde tawtoregol maɓɓe e oo ɗoo kewu ko huunde waɗɗiinde, sabu maɓɓe hunaade wallitde ƴellitaare ɗemngal Pulaar. Mintu Koreera hollitii ko wonde ɓuri wonde caɗeele fedde nde hannde, ko waɗde feere mbele fulɓe ŋeddiniiɓe, ɓe ngaraani tawo e Fedde he ina nootoo nde, yanti heen fedde nde alaa dañirɗe so wonaa piye terɗe mum. Hikka aɓe nganniyii bismaade Baaba Maal mbele ina fijana ɓe ɗo Ndar ɗo.
