Aset 19 suwen 2025 seedanteeje jaŋde ndokkaama e nder wuro Kayhayɗi, to nokku biyeteeɗo “fuwaar”, caggal lebbi tati ɗi dental pelle ɗe ngonaa laamu keblatnoo sukaaɓe rewɓe, ngam seerndude ɗum en e humambinnaagal, tawi ko e eɓɓaande “Diango”.
Heblo ngoo fuɗɗinoo ko 10 marse 2025 ɗoon e Kayhayɗi, nder ɗemɗe nehniije. Waɗananoo ngoon heblo ko teemedere e sappo (110) suka debbo nder kominaaji tati. Tammbinoo ngo ko ko pelle ɗe ngonaa laamu e gardagol ONG epaañnaajo, ALIANZA e ballondiral e Save The Children, Amad e Globe e meeriiji kominaaɗi Kayhayɗi, Jowol e Neere Waalo, ngam ɗoftude sukaaɓe rewɓe ɓe duuɓi 18 haa 35. Ɓe njannginaama binndol e taro e hiisa, ɓe keblaa kadi e kattanɗe nguurndam. Caggal ɗuum heblo woɗngo sakkittoongo ngoo, ɓe keblee e binndugol e kuufgol eɓɓooje. Dawal kala heen heblo ko lebbi tati. Daawal gadanal ngal timmii aset ooɗoo 19 suwee 2025.
Ine tawtoraa ñalawma oo hoohooɓe diiwaan oo, hono meeri komin Kahayɗi e ardiiɓe pelle renndo, ummiiɓe e kominaaji tati ɗii fof. Udditi ñalawma oo ko debbo jooɗaniiɗo Fedde Alianza biyeteeɗo Victoriyaa, rewi heen ko Bah Saydu Usumaan jiiloowo Eɓɓaande “Diango”. Caggal ɗuum ko nulaaɗo komin Kahayɗi sokna Maadu Jakitee, e denndaangal jooɗaniiɓe pelle limtaaɗe dow ɗee. Yuɓɓini ñalawma oo ko jooɗaniiɗo Globe, biyeteeɗo Yaaquub.
Hooreejo Catal Fedde Ɓamtaare Pulaar he Kayhayɗi, hono porofesoor Usmaan Ñaan, tawtoraama kañum ne ñalawma oo, sibu ko ngaal Catal joginoo njuɓɓudi jaŋde ndee.
Konnguɗi kaalaaɗi ɗii fof, ngarti tan ko e semmbinde jaŋde e golle. Haa teeŋti e jaŋde sukaaɓe rewɓe. Semmbinde ɓe no ɓe tammborii nguurndam maɓɓe, ɓe ceerta e yowitaade e sabbaade. Jinnaaɓe sukaaɓe ɓee e denndaangal renndo ngoo ndañii weltaare mawnde. Oo ñalawma rokkii hoolaare maa heblooji garooji ɗii ndew laawol, mbele denndaangal paandaale padaaɗe heen ɗee ine njettoo.
Daawuuda Sammba Ndonngo
