Ndeentoɗee koy jaayya adoriima galleeji seeremɓe e sarifaaɓe !
Gila balɗe caggal juulde koorka, haa taaske darii, yoga e galleeji seeremɓe e sarifaaɓe wuro Kayhayɗi ngoo e saraaji mum, keɓii boomaare, tawi saabii ɗum ko sukaaɓe ɗiɗo worɓe Muritaninaaɓe, yahrooɓe e duuɓi 30 pawɗi, ina mbanngoo e saraaji hee.
To Kayhayɗi ko galle sarifaaɓe e galle Ceerno Sammba Yaayaa. Yantude e jeeyoowo leɗɗe ganndiraaɗo Liidel. To Riñnjaw ko Galle Ceerno Demmba e galle Aawɓe. Kamɓe sukaaɓe ɗiɗo ɓee, ɓe ngarat e galle ceerno, ɓe mbiya ɗum meeɗiino gollanaade ɓe, ɓe ndokki ɗum kaalis. Kaalis tolniiɗo e teemedere ujunere, kono alaa ko humtii e haaju hee hay huunde. Jooni ko kaalis maɓɓe tan ɓe cokli. Ɓe laawkinoo ɓe ngulla ɓe luuka. So oon neɗɗo hulii tan wooda ko totti ɓe, so hulaani ɓe njaha ɓe mbiya eɓe ngaddoyaa polis, ɓe njokka e haajuuji maɓɓe.
Ko caggal nde ɓe njaniri noon e galleeji ceertuɗi, woodi heen wullitoyii ɓe to laamu. Laamu nguu darii e njiilawu haa ɓe njaggaa ñalnde aljuma 21 suwen 2024. Ko ñalnde heen polis Kayhayɗi noddi ko ina tolnoo e yimɓe njeetato meeɗnooɓe arde ɗoon wullitaade. Kamɓe fof ko e galleeji seeremɓe ɓe ngummii. So wonaa jeeyoowo leɗɗe oo. Yantude e mekanisiyen peewnannooɗo ɓe oto maɓɓe, ɓe kuɓɓi aɓe ƴeewndoo, ɓe ɓennori ɓe ngartaani.
Altine 24/06/2024 wonnoo ñaawoore maɓɓe, ɗoo he tirbinaal Kayhayɗi…
Daawuuda Sammba Ndonndo
