Goo e nder daartol Kuwoyt ko rewɓe ina ngona depiteeji. Rewɓe nayo, jom en ganndal en, jannguɓe e janngirɗe toowɗe Amerik. Heen gooto ko porfeseer Filosofi, jom dipoloom to Dental Amerik. Heen gooto wiyetee ko Rula Dashti, jom doktortaa ko faati e faggudu, ɓooyɗo haɓanaa mbele rewɓe ina keɓa hakkeeji mum en…. Ɓee fof ko naatɓe e kesam hesaagu, piilotaako, muurnotaako, alaa ko haali waɗde melfe…
Duuɓi keewɗi jooni ko ‘islaa mist’ en tan keewnoo hoonaade e woote nder ndii ɗoo leydi. E ngoI ɗoo laawol noon ɓe ndeestiima no feewi, sibu ko gooto e maɓɓe tan dañi toɗɗeede, hay noon ko sabu ballal leñol mum, wonaa sabu fiɓnde mum politik, ɗum ko wonande laawol ‘sunniyankooɓe’. Wonande laawol ‘salaa fiste’ en, ɓeen kadi njahrii caggal. ‘Shi’iyannkooɓe’ ɓe, nde tawnoo mbaɗi ko kampaañ tuugiiɗo e ɓiyleydiyaagal, ngardinaani miijooji diine, keɓii njeñtudi moƴƴiri: ɗiɗo e rewbe toɗɗaaɓe ɓe ko e doggol maɓɓe njeyaa. Kala etinooɓe huutoraade toon diine, ndañaani njeñtudi moƴƴiri. Mbele ɗum ko maale ƴellitare renndo Kuyowtenaaɓe, fuɗɗiiɓe seerndude diine e dawrugol ?
