Manngorof (Mangrove) ko dunli bewooji e powle maaje deeƴɗe, ɗo ndiyam mbelɗam e kaaɗɗam keewi jillondirɗe, ɗum noon, ine hasii tawa ko e jupporɗe maaje. Ɗi keewi wonde ko he nokkuuji hakkunde ŋori haa teeŋti he Afrik, Asii fuɗnaange worgo e huunde e Amerik (Floride e Beresil). Eɗi tawee kadi e jupporɗe ƴerngo geecuuji walla e leslesi nokkuuje hakkunde ŋori, walla jupporɗe (baltirɗe) won e maaje, no mbiyruno-ɗen nii. Manngorof ine nafa no feewi to bannge nguura, ine reena powle maaje e bempeƴƴe, tee ko desirgal karbon. Ine wallita kadi ustude musibaaji weeyo jotondirɗi e ɓeydagol nguleeki. Ko nokkuuji keewɗi ngaluuji (dunli e diƴƴe) wonande yimɓe wuurɓe he saraaji mum. Goodal manngorofaaji ine soklini sibu ko nokkuuji kisnooji, ballitooji biltugol tippule nguurndam caggal mobbooji e sunamiiji ballitooji faddaade ƴerngo maaje…Kullon keewkon ine tawee ɗoon, haa teeŋti e eddaaji keewɗi colli e pucci jahe, e guje… e liɗɗi. Kon kullon fof ine nguura e nder ndiyam e njoorndi fof. Koowooje e laadooje e colli ine keewa ɗoon. Puɗi : leɗɗe puɗooje heen ɗee, ko leɗɗe muñɗe lamɗam, muñɗe baylagol ile, muñɗe leydi tekkundi e naange wulnge. Ine hasii daɗi ɗeen leɗɗe ngonaa irooji no feewi sibu huunde e majji ko boowal ngonata.
Bookara Aamadu Bah
