Tuggi 7 haa 9 desammbar 2012, keerol gonnongol hakkunde Ɓoggee e Demet momtiima haa laabi. Waatii no waynoo ndeen nde maayo wonnoo duhol hakkunde rewo e worgo, oon sahaa nde worgo wonnoo seeɗaano, rewo woni ruumaano.
Nde fuutankooɓe ndematnoo waalo bannge worgo, ndemoya jeeri bannge rewo. Oon sahaa nde fuutankooɓe kuufi maayo rewo e worgo fof, hade tayooɓe enɗam, ɓee tubakooɓe halfooɓe, seerndude rewo e worgo, ceerndi galleeji e ɓiɗɓe yumma…
Hol ko Baaba Maal Waɗi ?
Maa wood jaabiiɓe wonde » Baaba egginii hikka kewu heewnoo yuɓɓinde Podoor nguuoo, kewu mbiyeteengu “ Blues du Fleuve” faynii ɗum Ɓoggee e Demet « . Ɗum noon, heewɓe teskotoo tan ko fannu naalankaagal ngal. Ko goonga angal heen ; kono, wonande en, ko o waɗi koo wappitiima kewu pinal ɓolal tan, sibu o jokki ɗoo ko enɗam ɗam tuubakooɓe taƴnoo. Kewu oo, ko kewu renndo, ko kewu faggudu, ko kewu jokkere enɗam hakkunde leyɗe ɗiɗi, hakkunde » leeɗe ɗiɗi » wuro wooto, so hakkunde Ɓoggee e Demet, hakkunde wuro Aadama Sammba e Dubbaango… Kono ɗoon, en ɗaldii daartooɓe. Ɗum noon, eɗen mbaawi wiyde, tuggi 7 haa 9 desaambar 2012, Baaba Maal wuurtinii enɗam, yo Alla jokku balɗe makko, hokka mo ko fodani kala guurtoowo enɗam koo. Aamiin.
Ko ñalnde aljumaa 7 kewu nguu udditi ɗo tufnde Ɓoggee-Demet ɗoo, o udditiri cubalaagu, sibu ko yiido laaɗe e cappaali jaaltaɓе. Ко maa njiyraa gite maa, oo aduna dennduɗo ñalnde heen e ɗee powle ɗiɗi meeɗaa yiyeede. Ɓoggee soki ko gila e tellorde pom, kala leelnooɗo arde, waawaa ɓennude ɗoon, fof ko ko soki haa maayo.
Meer Ɓoggee, hono Aadama Muusaa Bah (taanum Aadama Sammba jimreteeɗo wuro Demet ngoo) e Meer Demet, hono Maamuudu Jah (Gardiiɗo nokku toppitiiɗo diƴƴe to Senegaal) ƴettii konngol ngam teeŋtinde jojjugol tiiɗtingol jotondire ɓiyngu yummaagu kam e jam hakkunde denndaangal leyɗe denndude Maayo Senegaal ngoo.
Koolaaɗo Kuuɓal jaagorɗo geɗe nder leydi Muritani wagginii » cosgol geɗe ɓallitinooje ɓesnguuji leyɗe Muritani e Senegaal « . E miijo men noon, ɗiin ɓesnguuji meeɗaa woɗɗondirde, meeɗaa seertude, hay so tawii noon laamuuji taƴ-enɗamaagu ina etoo sahaa e sahaa kala felɓondirde ɗi…
Jammaaji tati ɗii kala ko kiirɗe mawɗe njubɓinaa e tawtoregol naalankooɓe heewɓe : Siidi Baylel, Hawwaa Jimmeera, Bayaana, Binta Lalli Soh, Jibi Daraame, Aliyuun Gise, Nuura Mintu Seymaali.
Koolol hikka ngol renndini ko kooli ɗiɗi : Koolol gadanol ngol ko » Koolol Maayo « , denndinoowol naalankooɓe leyɗe kuufɗe Maayo Senegaal ɗee (OMVS), so naalankooɓe Muritani e Senegaal e Gine Konaakiri e Mali, ngol faandaare mum woni « Wallitde ƴellitaare nokkuure, semmbinde ƴellitaare faggudu e nokkuuji hee, e hisnude e ubbitde faayiida ndonaandi pinal nokkuuji ɗii « . Koolol ɗiɗmol ngol ko » Koolol Gaaci Maayo (Festival Blues du Fleuve) ” ngol Baaba Maal yuɓɓintunoo Podoor, ngol o fodnoo yuɓɓinde laawol mum jeetaɓol to Ɓoggee.
