Mooƴu, gilɗi ɓutti, buubi ɓutti (burɓutti) e koowooje goɗɗe ɓuri liɗɗi e teewu heewde geɗe nguura. Koowooje ine ñaamee nder won ɗiin nokkuuji Afrik hakkundeejo walla hirnaange, tawa ina kecciɗi, walla caggal nde cahaa, walla ina njoori. Won faggotooɓe kadi koowooje, njeeya. Koowooje ngalaa ƴiye, fof na ƴakkoo. Tee ina ngalɗi to bannge nguura, gila e porteyiinaaji. Aɗe neeni (rokka semmbe), aɗe mbaɗi witaamiin (haa arti e witaamin B), e oogaaɗe (njamndi e senngu). Ɗum noon, so ɗe ɓuraani liɗɗi e teewu mboɗeewu e ndiwri, ɗe njaasaani ɗum en.
E ɗii sahaaji heegeeji, hol ko haɗi yimɓe waɗtude nehde koowooje, no nehrata kullon keddikon kon nii, ngam ñaamde ɗum en ?
Yoga e leyɗe pamare doole ine ñaama koowooje. Kono, to won e leyɗe mawɗe, walla e huunde e diiwanuuji men, ɗuum ko huunde nefniinde. Won sikkooɓe koowooje ñaametee tan ko nde heege yillii, ɗum sellaani sibu won aadoriiɓe ɗum, tee korsini ɗum. Hol boom ko hadata ɗe ñaameede ? Hol ko seerndi ñaamde liingu walla gertogal e ñaamde mbaɓattu walla ngilngu ? Wonande ñaamooɓe ɗum ɓee, hay dara seerndaani ɗum. Heddiiɓe ɓee ne, alaa hujja njoganii ɗum, so wonaa taw kay diine ina haɗi ɗum, walla woɗa. Fotde 1 700 edda koowooje ñaamotooɗe ina ngoodi. Yoga heen njeyaa ko e leƴƴi koowooje dubuuje (tallooje…) walla ndefton Alla (ñalawma e jamma), walla leƴƴi buubi (ñaaku, ñuuƴi, buulal balaala) walla teŋke (baɓatti, teŋke goɗɗe), mooƴi, ɓuɗɗi, ciikooje ekn… Heen 250 edda ina ñaamee e Afrik, fotde 500 to Meksik, 180 to Siin, ekn… To Japon ɓuri waawde ñaameede toon ko buubi balaala. E leydi men hee, won wiyɓe adraarnaaɓe ina ñaama diwooji.
