Duɗal Pulaar kesal hurmbitaama ñalnde 18 colte 2017 e nder wuro Aañam Yeroyaaɓe e gardagol Daawda Soh, tawi faandaare ndee ko haɓde e humambinngaal e riiwtude keeri majjere e nder nokku hee. Duɗal Pulaar ngal inniraa ko Katante Leñol Kan.
Ngalɗoo duɗal garngal sukkude ŋakkanɗe diiwaan oo to bannge jaŋde, ummanii, e mbaydi laawɗundi, ko jannginde Pulaar, Quraana e sariya e ɗemngal farayse tawi huutortee ko jannginooɓe heblaaɓe, seedtanaaɓe. So Geno jaɓii, ɓeen jannginooɓe ko hoɗneteeɓe, ko darnanteeɓe lewru ngam waawde ɗooftaade golle mumen ko aldaa e lohre. Ɗeen nanondire walla ciifondire tabitintee kadi ko e yeeso jagge laamu, jooɗiiɗe e nokku hee, mbele gooto fof heɓa ɗerewol mum, annda fotde mum.
Kewu nguu hebanaama fotde jonte walla lewru timmunde. Nguu waɗaa ko ɗo duɗal ɗoo e dow kallu, hakkunde Cilon e Aañameeji. Nde geɗe ngarti haa e kikiiɗe toɗɗaaɗo oo, aduna fof anndinii won ko jogori kewde e nder wuro Aañam Yeroyaaɓe. Caaleeje ndarnaa gila subaka, toŋorɗe lasaa, mbaɗaa gori e les majje. Kaɓirɗe mawninooje daaɗe walla lottooje haa to ɓuri woɗɗude nebbisaa, nana pawondiri, cabbii e peɗeeli haralleeɓe sokittooɓe, sontuɓe. Nde takkusaan juulaa, wuro Yeroyaaɓe e hoɗɓe mum arooɓe cormitii, haa mbayi no sago, ndaaŋani duɗal. Gooto fof heɓi toŋorde, jooɗii, fadndii e yamiroore joom njuɓɓudi, jogiiɗo tuugnorgal kikiiɗe oo. Resndaa ɗeen golle ko Ballo Kan, oon woni Abdul Wahaabu Kan. Ballo ko suka nehiiɗo, kumpitiiɗo geɗe keewɗe, gannduɗo fotde. Gooto fof ɗo darinoo heɓii fotde mum haa timmi. Adii e dingiral ko lawɓe diiwaan oo, caggal ɗuum goomu Pinal Yeroyaaɓe jummbi ɓe, waɗi heen ko weɗɗaa, yimi jimol belngol. Nde jimol ngol joofi, alluwal duɗal ngal ko muuranoongal, muurtaa.
Kala noddaaɗo ngam heɓoyde seedantaagal mum, lawɓe ndewa e mum ena njima. So heɓii maande teddungal ngal, rokkoree kadi konngol ngam hollude weltaare mum walla wasiyaade jamaanu nguu. Nde ɗuum gasi, yimɓe ɓee njooɗtoyii, keɗtii yeewtere Gelongal Fuuta, nde tiitoonde: Aañam Yeroyaaɓe, hanki e hannde. Nde yeewtere ndee gasi, konngol arti ko e nulaaɓe gure walla e yimɓe teelɗuɓe, teskinɓe. E teskaade, caggal Aañameeji gure keewɗe nootitiima e dillere ndee: Ndulumaaji Demɓe, Koɓɓillo, Cilon, Madiina Kaaƴe Pawe, Ɓaarga, Hoore Foonde, Wuro Moolo, Njaakiri, Asnde Balla, Hooƴo, Madiina Gunaas ko jiidaa e rajooji nokku oo e nootitiiɗi.
Njaay Saydu Aamadu
Maa en ngartoy heen e tonngoode 156, so Alla jaɓii
