Annduɓe ko faati e koode to Orop ceediima (ñiytii) tagofeere nanndunde e leydi men ndi no feewi, tawi wonaa e yuɓɓo naange men nge. Ndeen tagofeere taarotoo ko hoodere nde fooynaani no feewi wiyeteende Gliese 581, « nde woɗɗaani no feewi yuɓɓo naange men nge, sibu woni hakkunde men e mayre ko 20,5 hitaande annoore » (années lumières). Ndeeɗoo tagofeere ɓuri leydi men ɓuttiɗde laabi 5. Nde tawnoo nguleeki mayre ko hakkunde 0° e 40° (hono ɗoo nii tan), ina yaakoraa ndiyam e nguurndam ina toon.
Tesko : wiyaama wonde nde woɗɗaani sibu « woni hakkunde men e mayre ko 20,5 hitaande annoore ». Ƴeewaa noon, hitaande annoore ko « yolnde nde annoore toccata e nder hitaande ». Ndaa, e nder leƴƴannde wootere, annoore ina doga fotde 300 000 km. Nii woni, so en kiisiima, e nder waktu, annoore ina doga 1 080 000 000 km (miliyaar e 80 miliyoŋ km), e nder hitaande ende doga 9 460 800 000 000 km (ujunnaaje jeenay e teemedde nay e capanɗe jeegom miliyaar e teemedde jeetati miliyoŋ km).
E nder duuɓi 20,5 biyaaɗi ɗi : 193 946 400 000 000 km !!! Njannganee koye mon. Baawɗe Alla.
