Fotde teemedde 2 “miliyaar” mballitaama ko ena abboo e duuɓi 4 golle kono maa mbiyaa ko sirƴude e geec sabu hay huunde gasaani e wuro laamorgo ngoo. Baŋ-yoo-baŋ ko gasɗe; kaalisaaji mbonii golle peeñaani. Hooreejo leydi Senegaal hono Abdullay Wadda halfinnoo golle ɗee ko biyi mum Karim Wad ina wallondira e Abdullaay Balde kono maa mbiyaa ko ñaamirgal : adi -adii nawa gabbel! Caggal eeraango Abdullaay Wad: paabee kam kala jogiiɗo galle ceniiɗo yoo luɓam min njippina heen hoɗɓe amen sabu jipporɗe ina ŋakki; ngoon eeraango goongɗinii wiynooɓe golle ɗee ngasataa e happu mum. Karim wad rufi ñamako e jaynge nde o ɓeydi heen yoo luɓe fotde ujunnaaaji 5 werlaaji (otooji) sabu eɓe njogii caɗeele mum.
Mbele ngal pottital ko diine walla ko nooso” njaguuji ?
Ko waawi heen wonde fof kam en paamii ko jogori safde so fasii luuɓataa, uurat! Hooreejo leydi Tirkii rokkii ngantu arataa e woɗɓe ɓe kaalaani tawa. Hannde nguurndam e NDakaaru ina saɗti ko hiño gila e noddirkon haa e yah-ngartaa. Ciftinen tan ko ngol waɗti laabi ɗiɗi ko Senegaal ina yuɓ ɓina ngal dental; ngola ko e 1991 e laamu Abdu Juuf. Ko leydi Arabii -Sawdiit adii bismaade ngal pottital e hitaande 1981, reftii heen Maruk e hitaande 1984; Koweyti e hitaande 1987; Senegaal 1991; Maruk gonngol e hitaande 1994; Iran 1997; Kataar 2000; Malesii e hiitaande 2003. So tawii Abdullay Wadda wonnoo ko e waɗde ƴeewndel baawal afo mum, kam mbiyen baa tuuba o hettani Karim heƴataa ɗum, woni bagi bonii Karim ɓoornaaki!
Mammadu Lih
