Pelle pinal ngenndiije, Fedde Ɓamtaare Pulaar he Muritani (ARPRIM), Fedde Ɓamtaare Ɗemngal e Pinal Sooninke (AMPLCS) e Fedde Ɓamtaare Ɗemngal Wolof he Murtani (APROLAWO) mawninii hannde, aset 26 colte (feebariyee), Ñalawma Ɗemngal Neeniwal to Suudu ganni ɗoo he wuro Nuwaasoot, tuggi w4 haa w7 kikiiɗe. Ñalawma oo mawniniraa ko kollitgol golle e defte Duɗal Ɗemɗe Ngenndiije, kam e golle pelle pinal ɗee, ko jiidaa e gaafgol tappirɗe e nder kuutorɗe karallaagal kesal ɗee. Jaayɗe keewɗe nootiima heen, yimɓe heewɓe kadi tawtoraama.
Ñalawma oo wonii fartaŋŋe kadi siftinde laamu Muritani nanondire e wasiyaaji baɗanooɗi he ñalɗi diisnondiral juɓɓinanooɗi he lewru oktoobar e noowaambar 2021 : so naattingol ko ɓuri yaawde jaŋde ɗemɗe ngenndiije tati ɗee (pulaar, sooninke e wolof) nder Tippudi nehdi e jaŋde leydi ndii, kam e cosgol njuɓɓudi kalfinaandi ƴellitgol ɗemɗe ɗee.
Lulnde karallaagal jaŋde
Ñalnde aset 12 colte (feebariyee) 2022, jokkorde pelle pinal yuɓɓinii gollordu (lulnde) ngam lelnude laabi njanngiin e feewnude kaɓirɗe jaŋde wonande ɓe kaalataa ɗemngal jannginteengal ngal. Pelle ɗee ɓurnoo dartoraade ko jannginde haalooɓe ɗemɗe ɗee, yeru Ɓamtaare Pulaar heewi jannginde he nder duɗe mum, ko haalooɓe Pulaar. Jooni noon pelle ɗee njiɗi ko heblanaade waɗtude jannginde yimɓe ɓe kaalataa ɗemɗe ɗee, yeru he nder duɗe keblooje jagge. Ndeen jaŋde ine waɗetenoo to duɗal jaaɓi-haaɗtirde (ine waɗee haa hannde), fuɗɗaama to duɗal ENAJM, to Duɗal Toowngal Politeknik (ESP) Nuwaasoot…, ine yaakoraa maa ɗemɗe ɗee mbaɗtu janngineede e duɗe laamu goɗɗe. Ko ngam heblanaade ɗiin soklaaji addani pelle yuɓɓinde nduu gollordu.
