Seppooji ngasataa hannde e leydi Farayse ngam hollitde ko joli ñalnde 6 ut 2008 to Nuwaasoot wonaa goonga, ɗooftaaki laawol demokaraasi. Hannde 6 settaambar 2008 (lewru fat caggal nde Seneraal Abdel Asiis happorii laamu demokaraasii doole, liɓi toɗɗaaɗo ngenndi hono Siidi Muhammed ɓul Seek Abdallaahi. E noddaango Seŋngo ngenndiijo daraniiɗo kisal demokaraasii e Muritani (FNDD), pelle keewɗe nootiima e seppo yuɓɓinaango e nder reedu wuro laamɗorgo Normanndi (Haute), Ruwaa.
Woni daande noddaango ngo ko duttagol leydi Muritani e laawol sarɗiiji. Tuggi w13 haa w15, yimɓe ummiiɓe baŋ yoo baŋ ena ngara yantude e seppo ngoo e boowal Katedaraal Ruwaa. Nokku cuɓaaɗo oo woni ko e hakkunde wuro ngo, ko o gareteeɗo kadi sabu ko nokku lolluɗo. Ko Saanga w15:30 seppo ngoo fuɗɗii wowlude eeraali feewde gartal Muritani e laawol goonga. ƴuɓɓinɓe seppo ngo ngaddii ɗereeji ngam sarde e kala garɗo e boowal ngal, woni ɓaleejo mum walla tuubaako mum. Ɗerewol ngol woni wowlaandu fedde nde e weeyo wonngo Muritani hannde ngo. Nde seppo ngo toƴƴi daaɗe, tuubakooɓe yahatnooɓe haajuuji mum’en ngari heɗaade e naamnaade yo paamne ko joli Muritani. Heewɓe e maɓɓe ngari njooɗii ena keɗoo. E nder seppo ngo, daande ko wootere:
- Ɗaccitee Laamɗo o, mawɗo leydi ndi, toɗɗaaɗo e sarɗiiji demokaraasi.
- Kooniŋkooɓe yoo ndutto e lowe mum’en
- Yoo wuur demokaraasi
- Min ngalaa e kuudetaa o! Daande wontii wootere, oolel ena jaaboo ellee asamaan oo wonani ko seppooɓe ɓee.
Seppo ngoo jokki e toƴƴude daande haa saanga w16:30. Ko ndeen gardiiɗo seppo ngo, hono Bah Haymuut toɗɗaa yoo jaŋngu eeraango seppo ngo. E nder eeraango ngo, o hollitii wonde Muritani wonnoo ko e njiimaandi kooniŋkooɓe gila hitaande 1978. Caggal nde waylo ari e hitaande 2005, toɗɗe laamɗoyaŋkooje ngardini Siidi Muhammad ɓul Seek Abdallaahi e hitaande 2007. Nde o toɗɗaa, Sidioca waɗdii e ngenndi ndi aadi maa artir goonga e dental e ngootaagu e leydi ndi. O fuɗɗi darnude kuule yo moolinooɓe kala ngartu, o darii a haɓaade kala caliiɗo yaltude e kalfiigu e yoga e bonanndeeji ɓooyɗi waɗeede e Muritani. E dow jaasre bonnde nde kooniŋkooɓe kolli nde ɓe liɓi laamu nguu, FNDD ena hesɗitina salaare mum yoo kisal leydi ndii tame e juuɗe kooniŋkooɓee tawa ɗooftaaki e laabi didanaaɗi leydi ndii e demokaraasii.
Fedde ndee ena weddo wulaango:
- Yo laamɗo toɗɗaaɗo Sidoca ɗaccite jooni-jooni, kadi o artiree e jappeere nde ɓiɓɓe Muritani joƴƴini-mo e sarɗiiji demokaraasii.
- Yo lanndaaji leydi ndi, laamu Farayse, pelle gollotooɓe, dente, e yiɗɓe Muritani kala, yiɗɓe daranaade hakkeeji ɓiɓɓe leydi ndi, ɓeen kala yo ngontu daande wootere e naamnaade yo leydi artire e laawol ngol demokaraasi naatani hade 6 Ut 2008.
Caggal nde eeraango ngo wowlaa, kelle poɓɓi, dental ngal fusi, kono heewɓe e arnooɓe ɓe ko ɗoon keddii ngam wostondirde ñiiɓirɗe e hakkillaaji. Mawɗo seppo ngoo jaarii arnooɓe tawtoreede kala, yanti heen tuubakooɓe arɓe njanti e seppo ngo e kala dariiɗo hay so ko hoYom ngam heɗaade ko ɓiɓɓe Muritani ngarnoo nantinde aduna oo kala : Yoo demokaraasii artire e leydi ndi ko yaawi ! Ena tawtoraa seppo ngoo pelle ɗeeɗee: APP, UFP, TASSAɓOUL, PLEJ Représentants des Verts, élus du Conseil municipal de Rouen, délégations venues de Elbeuf, Le Havre, Paris et Rouen. Nelaazo LES VERTS, ELUS CONSEIL MUNICIPAL ROUEN setooji: Elbof (Elbeuf), Aabar (Le Havre), Pari (Paris) e Ruwaa (Rouen)
Kuɗol Ibraahiima SAAR, mo pulaagu.com
