M 23 (Dillere 23 suwee), woni dental partiiji e pelle renndo taɗanii Abdullaay Wad lajal, yo wiy wonataa kandidaa e woote gardagol Senegaal jogorɗe yuɓɓineede e hitaande 2012. Ɓe ndokkii mo haa juulde taaske. Ɓe taƴanii mo ngaal lajal ko ñalnde aljumaa 23 settaambar 2011, e kawrital ɓe njuɓɓinnoo to Ndakaaru. Ngoon jeertinaango, sibu ko jeertinaango, yalti ko e hunuko Aliyuun Tiin, kalfinaaɗo konngol M23 : “ min njaɓaani mandaa tataɓo wonande Wad ”, “ min ndokkii mo haa maayirɗe oktoobar ngam o habra wonde o haaytii wonde kanndidaa ”. Faandaare M23 ko woto Abdullaay Wad won kanndidaa. Diiso Doosɗe ina foti bayyinde e maayirɗe saawiyee doggol birgooɓe hooreyaagal leydi Senegaal, fotɓe wootondirde gadanol ñalnde 26 feebariyee 2012.
M23 ina anniyii, so tawii Wad jaɓaani woppude, seppude ñalnde kala, haa nde o woppi fof, hono no “ Ben Aali woppirnoo nii ”. Ciftinen tan Abdullaay Wad waɗii manndaaji ɗiɗi, sibu o toɗɗanoo ko e hitaande 2000, o waɗi duuɓi jeeɗiɗi (7), o toɗɗitaa e hitaande 2007 wonande manndaa duuɓi joy (5) caggal nde Doosɗe leydi ndii mbaylaa, manndaa waɗtaa duuɓi 5 fat, baawɗi hesditineede laawol gootol. Ɗum firti ko hay gooto waawaa wonde hooreejo leydi ko ɓuri duuɓi 10 deggondirdi. Wad ina yahra hikka e duuɓi 85. E hitaande 2009 o huninooma o wonataa kanndidaa e woote 2012, hade makko artude e konngol makko. Engal ɗoo dental, ɓe mbinndi e kaayitaaji : « SMS à Wade : Mame, bayi jotna (taanoo, jahdu yontii) », « Wade, yemal, dégage ! » walla kadi « ALERTE Non à la candidature ɗe Wade » (JEERTINAANGO : Alaa, min njaɓааni kanndidatiir Wad.
