Maamuudu Sammba Booli jibinaa ko ñalnde 8 saawiyee 1920. O waɗi jangde makko leslesre ko Kayhayɗi, caggal ɗum o jokkoyi to Ekkol dowrowo Blancho to Ndar e to Ekkol normaal jannginooɓe to Sebikotaan. Nde o joofni ndeen jangde, o naati he konu koloñaal. O woni heen haa e hitaande 1946.
Nde wolde adunaare ñifi, o arti Ndakaaru, joɗnde guwarnama Afrik Hirnaange, o naati e njuɓɓudi koloñaal. Ko e oon sahaa o gollii e meeri Ndakaaru hade makko fekteede Ndar. Oon dumunna hawri e toɗɗegol potɗo jooɗanaade Muritani e Asaambele leydi Farayse. O naati ɗoon fedde renndinnde janngatnooɓe e ekkolaaji koloñaal, jeyaаɓе daande maayo (UGOVAF : l’Union Générale des Originaires ɗe la Vallée du Fleuve, hono Dental Kuɓtodinngal Jibinannde Daande Maayo). Pecce ɗiɗi peeñii e ndeen fedde e hitaande 1948, tawi heen wootere ardii ɗum ko “ wontoyooɓe Muritaninaaɓe ”, jogorɓe sosoyde fedde woɗnde wiyeteende l’Entente Mauritanienne (Nanondiral Muritaninaaɓe) e gardagol Horma wul Baabana. Maamuudu ko e ɓeen jeyaa. Nde tawnoo koloñaal ɓurnoo horsinde ko Fedde wiyeteende “ Union Progressiste Mauritanienne ” nde mawɗo mum wonnoo Siidi el Muttaar Njaay, caggal ɗum Muttaar wul Daddaa, ɓe poolaa e woote toɗɗagol depiteeji e kitaale 1951 e 1956 fof. Ko ndeen Horma fayi Maruk, tawti miijooji fedde wiyeteende Istiklaal e laamu Maruk, njiɗnoongu moɗtude Muritani.
Maamuudu yalti kam ne Entente, sosi fedde ina wiyee “ Bloc Démocratique du Gorgol” (Hаɓɓere Demokaraasi Gorgol) e hitaande 1956. Muttaar wul Daddaa faami omo jogii doole, noddi mo e dental doole politik ɗee e nder fedde wiyeteende RPM (parti kawrital Muritani), jogornde wontoyde PPM, hono parti bajjo gardinooɗo Muritani haa e hitaande 1978, nde kooninkooɓe polli laamu siwil en.
Caggal Мооɓondiral Eeleega 1958, Muritani hettanaa doosɗe leydi, sompаnaa guwarnama mum ɗiɗmo : Maamuudu ina jeyanoo e oon guwarnama sibu kanko wonnoo heen jaagorɗo Teeru e koɗki. Caggal ɗuum, o wonii jaagorɗo Kaalis, caggal ɗuum kadi, Hooreejo Asaambele ngenndi.
Sabu ngal baasal mawngal, Fedde Ɓamtaare Pulaar e Muritani ina duwanoo denndaangal Muritaninaaɓe, haa arti noon e ɓesngu cankiiɗo oo.
Fooyre Ɓamtaare
