Ñalnde aset 25 ut 2012, Yiilirde FBPM yuɓɓinii ñalawma ngam miijaade e peeje denndinirɗe kaalis ngam mahngo galle Pulaar e Nuwaasoot. Ɗum ɗoo ko caggal nde haralleeɓe toppitinooɓe millugol ko mahngo galle oo daɓɓi e ngalu njoofni golle mum en. Yo Alla yoɓ ɓe moƴƴere, sibu ko golle kittuɗe, potnooɗe ɗaɓbude ngalu keewngu ɓe njoofni ɗoo, tawi ko yarlitaare mehre. Hiisa oo hawrii e 250 miliyoŋ ugiyya. Ɗuum woni ko mahata galle oo, no yidiraa nii. Geɗe keewɗe ina njiɗaa maheede heen, gila e gollorɗi, haa e defterɗi, cuuɗi jaaynde (rajo, tele, Fooyre Ɓamtaare), janngirɗe, batirɗe, saal kewuuji (ɗo fijetee, walla waɗee batuuji mawɗi), juumaa ekn… Tawa noon fof ina yaltini pulaagu. Ɗoo e dumunna paaɗo, so Alla jaɓii, ko en ummantooɓe renndinde oon kaalis ngam sompude galle pulaar oo.
Ɗum noon, Fulɓe e kala horsinɓe pinal ndañii haaju. Eɗen ñaagii nde yimɓe fof ndarantoo ɗuum, sibu ko faayiida leñol ngol jogori ɓeteede ɗoo : eɗen keewi nande, oo ko ngenndiyanke, oo ko daraniiɗo leñol…
Moƴƴii, jooni kadi en ndañii ɗo gooto fof waawi hollitde yiɗde mum pinal men.
