Demal wiro e nder Maali ena wonndi hannde e caɗeele mawɗe. Remooɓe heewɓe ngoni ko e woppude demal bukki sabu maggal waasde jogaade ngartam. Kono ko ɓuri heen faaynude woni Mbaylaandi (isinaaji) bukki ngoni ko e ummaade e juuɗe laamu ena fayti e juuɗe jom jawɗeele en. Ko ɗum waɗì heewɓe e remooɓe ɓee ena ngonndi e faayre mawnde haa won e maɓɓe paytii e demal leɗɗe goɗɗe. Remde bukki ena heewi fere kono kadi coñal ngal soodirtaake no fotiri nih. Hitaande kala, remooɓe bukki ena ustoo sabu waasde maɓɓe yiyde heen nafoore. Ɓe keewi ko ñamlaade ko ɓe njoliri waalo bukki ɗii, kono coñal ngal waawaa addude ko ɓe njoɓiri ñamaale ɗee. Ko ɗum addani heewɓe e remooɓe ɓe roondaade ñamaale tedduɗe e mum en haa ɓurti. Hannde, demal ɓuri faytude ko e basalle e gawri e diwanuuji Beleko, ekn.
Maali woni leydi ɓurndi heewde remooɓe bukki e Afrik ɓaleeɓe. Njeeygu bukki ɗii ena naatna ngalu keewngu e leydi ndii. Kono remooɓe ɓеe ɓeydii ko waasde e tampude. Eeraango ena wullaa hannde feewde e laamu Maali mbele ena ɓama kuule ko yaaccii ngam heɓɓitaade remooɓe bukki sabu ko ɓe jaale e nder faggudu leydi ndii. So hay huunde waɗaaka, demal bukki e nder Maali jogori ko nattude ko neeɓaani.
Ñiiiɓirde pulaagu.com
