Ñalnde aset 21 sulyee 2007, porfesser Mammadu Lamin Taraore Jaagorɗo leydi Mali toppitiiɗo ko fayti e jaŋde sankiima to Bamako. O sankorii ko duuɓi 60. O wirnaa ko ñalnde heen. Porfesser Mammadu Lamin Taraore ina anndiranoo wonde ganndo ko fayti e filosofi, pindinoowo, neɗɗo politik, kaɓeteeɗo, demokaraat. Ko o neɗɗo sendikaa kadi, ngenndiyanke mawɗo, jankiniiɗo. Mali waasii ɗo neɗɗo pinɗo, mo meeɗaano seerde e daranaade nuunɗal e goonga e ndimaagu. Mammadu Lamin ko porfeer filosofi. Omo jeyaa e darinooɓe haa liɓi laamu Muusaa Taraore ñalnde 26 marse 1991. O jeyanoo ko e goomu ngardinoongu Mali (Comité de transition pour le salut du peuple (CTSP1991/1992)) caggal njangu Muusaa Taraore. Omo jeyaa e sosɓe parti biyeteeɗo ADEMA gardiiɗo Mali ummaade 1992 haa 2002. O yalti ADEMA e hitaande 1994 tawi omo woni jaagorɗo njuɓɓudi leydi, o sosi parti makko biyeteeɗo MIRIA (Mouvement pour l’indépendance, le rassemblement et l’intégration africaine). Gila 2002 ko o jaagorɗo e nder guwarnama Aamadu Tumaani Tuure. Omo woppi sukaaɓe tato. Fooyre Ɓamtaare e Fedde Ɓamtaare e Muritani ina nduwanoo ɓesngu makko e ɓesngu Mali no diidorinoo.
KA Fary a écrit: Musiɗɓe tedduɓe gooto e haralleeɓe mawɓe ko fayti e jaŋde e nder diiwaan men o, ruttiima to joomum e ooɗoo aset 21 sulyee 2007. Alaa oon so wonaa Mammadu Lamin Taraore, jaagorɗo jaŋde leydi Mali. E nder ɗuum miɗo duwanoo denndaangal musiɗɓe kam e ɓesngu makko. Yo Alla yurmo mo yaafoo mo, haarna mo Aljanna. Aamiin. Fari KA
