Ko laamɗo gooto wonnoo omo ummii diiwaan hirnaange omo yaaɓani to diiwaan fuɗnaange, omo rimndi ngelooba makko dimngal tamarooje omo waddi ɗum e liggatooɗo makko ina ɗowanamo ngelooba ba, kankone omo waɗɗii e ngelooba makko omo rewi heen, ndeen ɓe ñalli yahde haa jamma heɓtiiɓe e nokku ɓe mballini, ndeen weetndooginii khaliifa o yamiri yoo liggotooɗo o huudo (roƴ) kañum e ngelooba ndimnduba tamarooje ba, o wiyi yoɓe njah so weetii maa o abboɓe, liggotooɗo o ɗowi ngelooba ba yehi, ndeen yehii haa weeti laamɗo o abbiiɓe, kono tan ɓe majjiriimo o ronki yi’itudeɓe o ñalli e njiilaw haa naange wojjini omo laaknaɓe omo roŋki yi’itudeɓe, hao tampi, haa hedde mutal naange o yani e mawɗo Pullo gooto ina waɗi cuurel mum e nder ladde tuulaa heela ina wondi e jawkal mum, o salmini mawɗo Pullo o, o wiyi mawɗo pullo o miin dey mbiɗo laakna majjere am, ngelooba am e ɗowoowo ɗum gila subaka koe njiilaw ngonmi, mbiɗo ronki yi’itude.
Mawɗo Pullo o wiyimo wonaa ko ngelooba ɗokka yitere nanere ina rimndi tamarooje?
Tan o giddi haa dow o wiyi eyyoo ko baan tigi, hol toba woni?
Mawɗo Pullo o wiyi alaa mi yiyaaniba kay
Owiyi aan kam a jalkitat kam walla? yaa sifo ngelooba am haa laaɓa kadi mbiyaa a yiyaani? o ruŋtii o wiyi omo yaha mawɗo Pullo o wiyimo ar gaay, wonaa ɗowoowo o ko laƴoowo koyngal ñaamal? owiyi ko noon tigi, mawɗo o wiyi ɓe ndewii ɗo eɓe tiindii diiwaan fuɗnaange hedde waktu 12h ɓe pooftii e kiya lekki, Owiyi hol toɓe ngoni noon? Mawɗo o wiyi wallaahi mi yiyaaniɓe, O wiyi mawɗo o aan kam hol no mbawirɗa sifaade ɗum ɗo fo tawi a yiyaaniɓe? hol no nganndirɗaa ɓe pooftiima e lekki he hedde waktu 12h tawi a yiyaaniɓe? Mawɗo o jaggi e juŋngo makko wiyimo ar mi holluma, mawɗo o addimo haa e les lekki he hollimo maande ɗoɓe njooɗi no ɗo, mawɗo o wiyimo aɗa anndi kam ko neɗɗo haanga ko fof arataa e lekki ngam fooftaade jooɗo e baŋnge naange o? O wiyi alaa pooftatooɗo e lekki kay jooɗatoo koe ɓuuɓri, mawɗo o wiyi wadde ko ɗum anndini kam ndeɓi njooɗii ɗo nde taw ɓuuɓri ndi ina sawndii ɗo, nde ɓuuɓri ndi nde sawnddi ɗo nde fotata wonde ko hedde waktu 12h O wiyi hol no nganndirɗa ngelooba ba rimndi ko tamarooje?
Mawɗo o naŋngi e juŋngo makko nawimo e suudu korndolli ina sara ɗoon o hollimo korndolli ɗi ina mbaɗi laawol tuggude to ngelooba ba jusinoo ɗo, haa yettii suudu majji o hollimo ko korndolli ɗi ndusata ina naatna e suudu mum en ko iwata koe tamaro, owiyi ko ɗum anndini kam ngelooba ba rimndunoo ko tamarooje, O wiyi ɗum fof de kam ko goonga sabu maale mum ina peeñi, kono ko mbiiɗa wonde ngelooba ba ko ɗokka yitere nanere ko, ɗum ne hol to mbaawɗa dañde maande mum? Mawɗo o nawimo to ngelooba ba duratnoo ɗo, o hollimo ngelooba ba ko baŋnge gooto ba durdata woni baŋnge ñaamo o, owiyi ko ɗum anndini kam yitere nanere nde yiyataa, O wiyi ɗum fof de ko goonga Kono hol no nganndirɗa ɗowoowo ngelooba ba o ina laƴa koyngal ñaamal? Mawɗo o kadi jaggi e juŋngo makko nawimo haa e laawol he, wiyimo teppe makko nani, a yii teppe ɗe potaani, teppere nanere nde ina timmi, teppere ñaamere nde kañum ƴuɓɓat, ko ɗum anndini kam koyngal ñaamal ngal ina laƴa, En nganndii mawɗo soodaani ganndal ɓooy wuurde!!
Fadil Athie, ittaa ko e facebook
