Hikka waɗi duuɓi 4 ko Fedde ƴellitaare ina mawnina innde mum ɗo e Nuwaadibu. ɗum tagi ñalnde aset 24 lewru mee 2008, saanga waktu 5ɓo kikiiɗe haa waktu 10ɓo jamma, fedde nde yuɓɓinii hiirde pinal to leegal tufnde 5ɓere Nuwaadbu. Ko gollaa e hiirde nde, ko hono nii lelorii : Ko adii nde hiirde nde ina fuɗɗoo ko wammbaaɓe ngadii jirwinde kewu o. Caggal ɗum udditgol hiirde nde naatanaa. Adii fof ko jaŋde Al Ɓuraan, tawi janngi ɗum ko Muusa Bah, refti heen ko jimol bismaango, caggal ɗum ko konngol udditirgol hiirde nde, ngol hooreejo fedde nde, hono Njaay Saydu Usmaan jeyaaɗo to Feeralla, waɗi ngam bismaade banndiraaɓe arnooɓe tawtoreede hiirde nde e hollitde payndaale, golle e eɓɓaaɗe fedde nde. Refti heen ko jimol ngol goomu pinal Kawtal pelle Nuwaadibu waɗi, caggal ɗum ko jimol « goomu yonta hannde mo janngo » e gardagol Lamin Gey. Refti heen ko yeewtere ko fayti e noddirkon hannde ngam ƴeewde nafoore e bonannde makkon tawi hebli ɗum ko Rugi Gise, refti heen ko njalniika paytuka e ngootaagu, caggal ɗum ko naalanke Abdulaay Baal gooto e naalankooɓe wuro ngo waɗii heen jimol.
Goomu pinal fedde nde ruttii addi jimol ngol tiitoonde mum woni «aduna hannde», refti heen ko goomu pinal Foonde Elimaan waɗii heen jimol « baaye», caggal ɗum ko yeewtere tawi tiitoonde mum ko «holi ko tonngi leñol fulɓe» yeewtiyanke o ko Abuu Joop. Goomu pinal fedde nde ruttii yuɓɓini njalniika paytuka e nguurndam galle (ballondiral), caggal ɗum ko naalanke lolluɗo hannde e Nuwaadibu, hono Gedda Gey, waɗii heen jimol, o seeraani e kala sahaa waɗde heen jimɗi baɗɗi faayiida no feewi sanne, ko hono noon naalanke Aadam Kulibali yuɓɓinii heen ko waawi. Caggal ɗum ko konnguɗi hoohooɓe mawɓe arnooɓe tawtoreeɗe hiirde nde.
Kewu o uddiraa ko jimol debbo yoo ɗoofto jom galle mum. Ɗowi hiirde nde ko musiɗɗo men Aamadu Sih. Eɗen njetta denndaagal terɗe fedde nde e darnde nde ɓe ndarii ngam ƴellitde pinal men e ɗemngal men. Eɗen duwanoo ɓe nde ɗum yahrata yeeso, nde Geno toowɗo o juutnata balɗe maɓɓe moƴƴina battane maɓɓe (aamiin).
Abuu Kan Nuwaadibu.
