Yeewtere Muusaa Ndonngo (Woolum Neerenaajo) e rajo Gorgol yowitiinde e pinal
E yowitaade e ko nan-mi, e fawaade kadi e addude heen miijooji mum, mbeɗe rokka anndinoore nde wonaa fibnde, ko nde udditiinde e kala miijiyanke pullo, ngam mbaawen yaajnaade e luggiɗinaade e wiɗto helmere ndee no haanirta nii.
Anndinoore : ko denndaangal won ɗiin aadaaji e donaaɗi won ngool leñol, ngol ɓiɗɓe mum poti heeroraade e huɓindaade e nder nehdi e hakilantaagal ngam wostondirde eɓe wuurdi e sato mum, tawa njaɓɓaani e neɗɗaagal e goowaaɗi woɗɓe ɓee. Ɗum noddii nehdi e nder renndo. Hol ko ɗum firti ? So yimɓe ndenndii nguurndam, yo njaɓ jooɗodaade kaalda, coccondira, ngostondira miijooji e caɗeele catiiɗe ɗum en ngam safrude ɗe, e sakkande ɗe peeje nafooje, e riiwtude ɗe, tawi hay gooto e maɓɓe yawaaki goɗɗo oo.
Ɗum noddii ƴoƴre, noddii kadi peertugol e eeɓgol hakkille ngam reende ngootaagu rennduɓe anniya. Hanki men, eɗen ndeeni enɗam, eɗen ndeeni pasiraagal, eɗen ndeeni kadi denɗiraagal e kala kala men. Hannde men, e fawaade e waylo-waylooji, ngam waasde wosteede nangtaade e won ɗiin aadaaji men moƴƴi, teskotooɗi kormondiral, teskotooɗi teddungal, teskotooɗi neesuuji men, ñeeñe men, mbaylaandi men, e karallaagal men, e fannuuji nguurndam ngam fewjude janngo men. Eɗen mbaawi, e fawaade e pine koɗe, suɓtaade e majje nafooje en, tawi mbonnataa jokkondire men e jeyɓe ɗeen pine. E tonngol : pinal ko sonngere dingiral yuumtunde e peelelaagal neɗɗo kuutortooɗo ɗum e geɗe nguurndam. Pinal na yaaji, na luggiɗi, ko maa wiɗtee, ko maa wiñee, saree, saakee ngam sarde ganndal.
Sammba Gata Bah, hooreejo Catal Kayhayɗi
