Ko dillere jabbaaji wiyetee noon. Dillere jabbaaji wiyeteende “ Min njabаani ” (On refuse) innaama ñalnde alaraba 25 saawiye 2012 to leegal jeegoɓal, to boowal Jam min Tekki. Nde renndini ko 51 diɗɗal jabbaaji.
Sukaaɓe heewɓe nootitiima heen, haa boowal ngal heewi. Ina jeyaa e tawtoraaɓe ɓee, mawɗo dillere “ Touche pas à ma nationalité ” e biyeteeɗo Bakkari Baccili, hono suka mo poliseeji leeptunoo e seppooji Kayhayɗi. Kamɓe jabbaaji ɗii ɓe kollitii wonde ɓe njiɗi ko haɓanaade potal e nuunɗal, huunde nde ɓe kaɓantenoo ko ɓooyi, kono, hannde kadi, aɓe njiɗi ɓeydaade teeŋtinde ɗum. Waɗi ɗum ko caɗeele teeŋtuɗe ɗe ɓesngu Murtani woni e mum en hannde ɗee.
Biyeteeɗo Omzoqui, gooto e fuɗɗuɓe ngal ɗoo dental “ Min njaɓaani” wiyi : “ ndee ɗoo dillere ko dillere naalankaagal. Min teeɗanaaki ndoolndoolaagu walla fitina. Darnde amen ko findinde sukaaɓe Muritani. Min mbaɗataa politik. Ko min dillere jaambureere. Kono amin ngondi e kala haɓanteeɓe nuunɗal e potal hakkunde denndaangal Muritaninaaɓe. Jolduɓe e laana, sago mum en ko wooto, ko joofde. Kono joofde hol toon ? Joofde e wellitaare. Eɗen katojini no feewi e wellitaare, eɗen katojini e tinde ngon-ɗen ko e leydi men, ko heen njeya-ɗen ”.
