Fulɓe mbiyi : «mo loppi guuroowo maayataa, mo moomi maayoowo ne wuurtataa». Ɗum heɓtii ko debbo o biyetee ko Mayram Sih, omo yahra e duuɓi 40.
Ooɗoo debbo, ko Alla danndi ɗum, sibu, duuɓi ɗiɗi kompres ina yejjitaa e nder reedu makko.
No ɗum ardi ?
Doktoor biyeteeɗo Basiiru oppirnoo mo ñalnde 04/03/05 to safrirde Ngenndi (CHN). Nde o oppirii haa waɗi yontere o arti tawi waɗtii muusde, o wiyi doktoor o won ko heddii e reedu makko. Jaabawol oon ko fettude reedu makko e wiyde “hay dara heddaaki ɗo” !
Lebbi seeɗa caggal, nde tawnoo muuso o haɗii mo joɗnde e darnde, o yahi to Saas Faam (sage femme), oon wiyi yo o o waɗ ekogaraafi. O waɗi ekogaraafi o, oon neldi mo to safrirde wiyeteende Opitaal Seek Saayde, e junngo biyeteeɗo Aysata ƴaayaa Bah. Ndeen ɓeen kollaama rajo o, ɓe mbiyi alaa ko ɓe njiyi. Ko nii woni o winndanaa ordonaas, ɗum seɓori seeɗa. Kono ɗum liɓti mo, tampini mo no feewi e lewru koorka ɓennundu ndu. O felliti kadi ruttaade kilinik, ɓe mbiyi mo kadi yo o waɗoy ekograraafi goɗɗo. Oon waɗaa. Kono hade maɓɓe heɓde ko laaɓi, tawi, e baawɗe Alla, ɗo o yahnoo taa di heen, ina weela e makko. O wondi heen balɗe tati, ñalnde nayaɓere nde ɓe ngarti, ɓetawi ɗoon doktoor mawɗo o, oon roRki ittude ɗum, o wiyi alaa e sago o waɗa oppeer goɗɗo. Alla waɗi biyeteeɗo doktoor Iselmu wul Siidi hawri heen, wiyi ina waawi ittude ɗum tawi seekaani mo.
Nii woni o itti ɗum ñalnde alarba 24/10/07. Ko min perii heen, e heen opitaal kala ina ɓura 70 000 mb. Tekkere fotnde nii woni e reedu neɗɗo duuɓi ɗiɗi, yalta, joom mum daɗa, ko baawɗe Alla. Kamɓe ɓeeɗoo, ɓe oo bone heɓtii, eɗen njenanaa eɗum heɓtoo heewɓe woɗɓe sabu yeebaare safrooɓe. Alaa ɗo ngullitto-ɗaa, sibu a alanaa ɗum doole. Kono tan, kala mo ina safroo, yo ekko jeertaade. Kamɓe safrooɓe ɓeene, yo ɓe nganndu ko yimɓe ɓe ceekata, wonaa jawdi. Tee kala golle ɗe peewaani, ko heddii heen ko, maa aduna fof tin.
Abdul Sih, hooreejo Catal Daar Nayim
