Ɓooyii fanndeede, fotii nde waɗi. Kippu Muritani fuku Bal dañii fartaŋŋeji ɗiɗi, so hawde kippu Senegaal e heɓde bolo feewde Afrik worgo ngam tawtoreede kawgel joofnirgel CHAN 2014. Nganndu-mi Muritani jaasaani leyɗe keddiiɗe ɗee fof, haa ko ina heeda laaci leyɗe fof. Leydi ndii meeɗaa waasde jogaade fettooɓe waawɓe, tee ɓuri yoga e leyɗe catiiɗe ɗum ngalu. E kitaale 70-80, Muritani ina joginoo kippuuji basket e Wolee Bal baawɗi. Yontaaɓe ɗeen kitaale ina ciftora Taatum (Ekkinoowo) e fettooɓe waaɓe no Mbooc en tato, ‘Leŋse’, Faal, Ndiaga, ekn. Eɗen njenanaa, so ardiiɓe ɓee cuɓaama e yimɓe fannu coftal ɓalli, so heedi-heeda e ngaybeela ɗaccii, ma en njettoyo ko ɓuri ɗoo woɗɗude. Heddii ko haa mbiyen Yo wuur Muribituun en. So ɓe njahii Afrik worgo, yo ɓe ngartiran en karaŋ oo.
CHAN, dottere « Championnat d’Afrique des nations de football » ko joofnirde kawgel fuku bal hakkunde leyɗe Afrik juɓɓinteengel duuɓi ɗiɗi kala (lomlomtondira e CAN) tawi fettata heen tan ko fettooɓe bal duumiiɓe e kolobaaji leyɗe mum en, ɗum firti ko kala gonɗo e kolobaaji caggal leydi, jeyaaka heen. Ngel sosaa ko e 2009.
CAN, hono « Coupe d’Afrique des Nations » woni kawgel fuku bal ɓurngel mawnude e ɓooyde juɓɓinteengel e Afrik. Ɗooyene, fettooɓe ɓee ko kala mo leydi mum suɓtii yo jeye e kippu mum, yo a taw fettata ko e kolobaaji leydi ndii, walla e kolobaaji goɗɗi.
