So eɗen ciftora, jeeyngal mawngal waɗanooma e guwarnama Seyn wul Seydaan. Woppaani ha o saami. Caggal nde oon ittaa, biyeteeɗo wul Waagef lomtinaa. Oon holliti yiɗde mum udditande laamu mum huunde e partiiji politik gonnooɗi e luulndo. Jeeyngal mawngal waɗaama e ɗoon guwarnama, haa liɓaa. Guwarnama tataɓo toɗɗaa. Eɗen ngarta e “duko” guwarnama camɗo jooni o.
Gila hedde 10 lewru sulyee, haala ka fuɗɗii yaltude wonde luural mawngal nana hakkunde mawɗo leydi ndi e ofiseeji kalfinaaɗi kisal laamu ngu e leydi ndi. Jaayɗe keewɗe njiɗiino fennude ɗum, kono hannde ɗum laatiima goonga. E maale gidiiɗe : jatugol parti biyeteeɗo UDP “keweendi laamiindi, woni wonduɓe e hooreejo leydi. Refti heen ko ñiŋooje gardiiɗo luulndo : o wiyi mawɗo leydi o ina foti woppude laamu.
Dalillaaji makko peeñɗi ko caɗeele leydi ndi wondi to bannge nguura, to bannge kisal… Partiiji goɗɗi, keewɗi kadi (ɗi ngalaa hay depitee gooto) ɗaɓɓii nde hooreejo leydi o woppata laamu. Depiteeji jeyeeɗi e senngo laamu ina ñiŋa e peeñcu laamu mum en. Ɗee ñiŋooje fof noon kuccitinaa ko e guwarnama mo dañaani tawo hay lebbi ɗiɗi. Cuusal won ɓeen kolli e ñiŋngol laamu ngu ina faamina wonde won ɗo ɓe ɓaarii ɗo tiiɗi. Geɗe ɗe ɓeydiima laaɓtude, sibu biyeteeɗo Mohsen wul El haaj, senateer Rooso, cukko hooreejo Senaa, ina jeyaa e ardiiɓe dillere yiɗnde follude guwarnama o. Oon noon ina wiyee ko sehil militeeruuji joopaaɗi ɗi. Ko e nder nduu jiiɓru, Yahyaa wul Ahmed Wagef, mawɗo hilifaaɓe, waɗi njillu tuggude 20 sulyee to Barakna e to Gorgol ngam ƴeewde ɗo tuugnorgal faabu (programme d’urgence) yahrata, yettoo kadi mooliiɓe artiraaɓe ɓe ngam ƴeewde no nguurdi. Nii woni o yettiima tuddule keewɗe, gila Gural, Hamdallaahi haa yettii Boyngel Cile …
O hurmbiti foorasuuji e koɗorɗe ɓeen puɗɗii mahaneede. Ko e nguun njillu o habri to Kayhayɗi pellital laamu ngu huccande haala warhooreeji baɗnooɗi e leydi ndi. Caggal nguuɗoo njillu, luulndiiɓe guwarnama o mbayi ko no hariiɓe nii. Kono, ɓooytaani hooreejo leydi ndi jooɗodii e depiteeji mettinɗi ɗi. Ina wiyee wonde mawɗo leydi o, e ndeen joɗnde wiyii wonde «so depiteeji ina njogii hakke, kanko ne omo jogii mbaawka». Balɗe seeɗa pawtii heen huunde e terɗe Adil njalti parti o. Ina heen koolaaɗo kuuɓal parti o. Ko waawnoo heen wonde fof, ɗiin depiteeji pelliti joɗɗinde to Asammbele to, ñalnde 30 suwee, ko wiyetee «ɗaɓɓaande goppugol golle» (Motion de censure), woni hollitde hoolaare maɓɓe e guwarnama o iwii. Hujja mo ɓe ngardini ko wiyde wonde guwarnama o ina waɗi ko wiyetee «Rumuus el Fasad» en. Rumuus el Fasaad woni «maaɗe bonanndeeji». Woni won ɓeen yimɓe seedtinnooɓe e laamu ɓul Taaya, bonnuɓe ngalu leydi … Kono kadi, les, won heen ur mooɓe wonde partiiji ɗiɗi luulndo keƴnanooɗi heen ɗi ina poti yaltude, wonde won ɗiin tirbiiji ina keewi heen yimɓe ….
Ɗeen balɗe, hawri batu Dental Afrik, ina foti jooɗaade to Misra, nokku biyeteeɗo Sharm el Sheek. Hooreejo leydi ndi ɗannanii toon kam fof e wondude e caɗeele. Won wiyɓe noon, hade makko yahde tawi o nanondirii e maɓɓe kamɓe soomɓe mettere nde, haa arti noon e militeeruuji tuumaaɗi kam en ngoni les ndeeɗoo mettere, yo ɓe ngoppu haala ka ha o arta. Kono ɗum yahraani noon, sibu ɓe ngoppi ko ha o yahi, nde ɓe njoɗɗini «ɗaɓɓaande nde ngam liɓde laamu ngu». Haɗi nde wooteede tan, ko tawi yiilirde Asammbele o hesɗitinaaka.
E nder daawal hakkunde ngal, partiiji luulndo ɗiɗi, kolliti wonde maa ngootan ɗaɓɓaande maɓɓe nde ngam yandinde laamu ngu. Heen parti gooto, hono RFD yahii haa yettii “Ooɗoo guwarnama ina foti liɓreede feere waawnde wonde fof”. Ndeen Siidi joftii, no janngo mum o waɗi diskuur ɗo o holliti pellital makko waasde jaɓde ko ɓe mbiyi ko, o siftini ɓe wonde, so tawii ɓe njokkii e ko ɓe ngoni e mum ko, laawol ina rokki mo hakke fusde asammbele e hoore mum. (Ƴeew diskuur makko.)
Jaabawol depiteeji ɗi e ɗuum, ko wiyde ‘hooreejo leydi o naatii ɗo fotaani naatde, so e fiyakuuji asammbele’ ekn… Huunde e renndo ngo ɗamininooma maa haala hooreejo leydi o artir deeƴre, gooto fof annda ko kanko tigi woni laamɗo, nde tawnoo haala makko ka o fawi ɗum ko ɗo tiiɗi, sibu o wiyi heen wonde omo fotndi heen fof.
Banndiraaɓe ɗoon jamma hay gooto anndaa ko kewi. Ko laaɓi tan, ndeen weetii, guwarnama dimosini, wul ɓaghef toɗɗitaa gardiiɗo hilifaaɓe. Balɗe ɗiɗi pawtii heen, o yuɓɓini yeewtere jaaynde ngam hollitde wonde ko partiiji ballitnooɗi Siidi e woote ɗii tan njeyetee e guwarnama garoowo o, hay so tawii noon won heen tawi kollitii mbawaa jeyeede e guwarnama mo militeeruuji tiimi. Kono ɗum ittaani, balɗe sappo e ɗiɗi haa njahdi e naange, ko deeyooji e pooɗondiral laamu. Ko ñalnde 15 sulyee, jamma, terɗe guwarnama keso o mbayyinaa.
Terɗe ooɗoo guwarnama ɗiɗmo wul ɓaghef ko 30. Heen 18 ko e guwarnama liɓaaɗo o njeyanoo, ko 12 ngoni heen hesɓe. Won tooñooɓe mbiyi wonde, ko goonga «maaɗe bonanndeeji» (laamu pergitte e bonanndeeji no yarham mum Al hajji Ngayde wiyatnoo), kono gooto e maɓɓe kala noddaama wiyaa wonataa e laamu, kono ina waawi toɗɗaade lomtotooɗo ɗum. Jooni noon ɗaccanan ne ɓe seeɗa, Alla dey ina waawi ɓe mbaɗa golle moƴƴe. So tawii ɓe liɓaaka ɗo e lewru kay.
Bookara Aamadu Bah
