Kaɓɓondiral awokaaji ameriknaaɓe e Angalteernaaɓe yuɓɓinii yeewtere yowitiinde e dummbaaɓe to Guwantanamoo, ñalnde 18 saawiyee 2007. » Addi min e Muritani ko yiɗde yiyde koreeji dummbaaɓe ɓe mbele amin mbaawa, e wondude e ballal laamu Muritani ƴ eewde umminde peeje mbele ɓeen dummbaaɓe toon ɓe ina mbaawa artireede, ñaawee e leyɗe mum en ñaawoore rewnde laawol » : ɗum woni ko Klin Stefford, gardiiɗo ngalɗoo kaɓɓondiral haali e yeewtere njuɓɓinnoo ɗo e Nuwaasoot ñalnde 18 saawiyee.
O wiyi kadi laamu Amerik ina soki yimɓe ko ina ɓura jooni duuɓi joy tawi ñaawaani ɗum en. E wiyde makko ɗum ina haawnii, sibu ɓeeɗoo mbiyata ko kam ɓuri aduna fof ñiɓaade e demokaraasi, tee ina mbiya wonde ko kam en ndeeni hakkeeji aadee. O wiyi o yilliima kasoo Guwantamoo o laabi 16, o heɓii yiyndirde toon, e cili keewɗi muritaninaaɓe sokaaɓe toon ɓe, haa arti noon e Ahmed wul Abdel Asiis e Muhammed el Amiin.
O wiyi toppitii doosiyee Muhammed wul Sellaahi, Muritaninaajo tataɓo cokaaɗo toon ko yimɓe woɗɓe. O hollitii nguurngam mbonndam ɓeeɗoo nguuri toon ɗam. O wiyi wonde leydi Siin hollitii wonde won ɗeen leyɗe ndañii heɓtude yimɓe mum en sokanooɓe toon, ko wayi no Angalteer : yimɓe 9 ngatiraama, ñaawaa, ngoppitaa. O hirjinii leydi Muritani nde ɗaɓɓata heɓtude ɓiyɓe mum.
