Raamata Joob lollirɗo ƴaayaa Jammee ɓuri heɓtineede ko ɗo e leydi Muritani. E hitaande 1996, ko o jaggal e duɗal Aliw Siree Bah ngal musiɗɗo Aamadu Sammba Demmbele (D.A.S.ɗ ɗowatnoo. E ndeen hitaande duɗe ɗe njuɓɓinii kawgelaaji hakkunde duɗe pulaar. E ɗeen pottitte ko heewi yaltinanooma e pinal Fulɓe. Raamata Joob, e oon tuma, wonaano naalanke dartoriiɗo ɗum. O ɓurnoo anndireede ko ngenndiyanke. Sabu makko welde daande, duɗal makko suɓii mo e yimiyankooɓe mum : DAS woni binndoowo, Raamata woni jimoowo. E nder ngaal diɗɗal companoongal, darnde Raamata seedtaama no feewi. E ɗiin duuɓi, jime Daas mbaɗtaa e leppi, ɓe piili leppi keewɗi. Gila ndeen, seeraani ko Raamata ina liggoo (golloo daande mum). Leñol ngol ina heɗtoo leppi ɗi. Haa ɓooyi, o felliti darnude diɗɗal biyeteengal YONTA AM : ko ngaal diɗɗal lollini mo, taccini mo maaje. Kono noon aduna ko lulnde, alaa mo ari hoɗde, mo woni fof ari ko yiyde ; ñande pele ngasi, ñaamɗe huuɓi, joom mum hoota sahre goonga. Kono ngee naange noon mutii.
Raamata hootii sahre goonga ñande 9/11/2006 to Ndakaaru. Denndaangal dillooɓe e pulaar ina nduwanee e ndee sankaare. Fedde Ɓamtaare Pulaar e Muritani, e pelle pine Muritani, e Senegaal, e kala yiɗɓe pulaar e nder jookli winndere ndee, ina nelda duwaawu feewde e jiknaaɓe makko. Yo Alla yurmo mo, yaafoo mo, haarna mo aljanna, waɗa mo toon e fooftorde, kanko e maayɓe juulɓe fof. Aamiin.
Yaayaa Ɓaas e Aamadu Mammadu SAL (Hooreejo e Koolaaɗo Kuuɓal Fedde Ɓamtaare Daande Leñol)
