E lewru suwee 2017, e joɗnde CEDEAO to Monrowiyaa, Maruk jaɓananooma naatde dental ngal. Kono, e joɗnde Abuja ñalnde 16 e 17 desammbar 2017 ndee, ɗum laataaki.
E lewru suwee 2017, e joɗnde CEDEAO to Monrowiyaa, Maruk jaɓananooma naatde dental ngal. Kono, e joɗnde Abuja ñalnde 16 e 17 desammbar 2017 ndee, ɗum laataaki. Ɗum noon heñaare e softeende nde Maruk hollanoo ndee ustiima no feewi. Kulhuli won ɓeen ardiiɓe leyɗe, kulhuli huunde e julaaɓe leyɗe dental ngal, caɗeele jowitiiɗe e doosɗe fedde ndee, yeru anndude leyɗe baawɗe jeyeede heen ekn leltinii ciynugol ko hawranoo koo.
E nder doosɗe dental, Cedeao toɗɗii tan ko leyɗe diiwaan hirnaange Afrik oo, ɗum woni diiwan leyɗe 15 jeyaaɗe heen hannde ɗee, yantude leydi Muritani. Ine wiyee ko leyɗe ɓurɗe doolnude e dental ngal, hono Koddiwaar, Ganaa, Senegaal, teeŋti noon e Niiseriyaa, ɓuri hulde gargol heen Maruk ngol. Jooni Maruk wiyaama yo sabbo haa joɗnde heñoraande faande e hitaande 2018. Joɗnde ndee toɗɗiima hooreeɓe leyɗe Togo e Koddiwaar e Ganaa e Gine e Niiseriyaa yo njuurnito batte naatgol Maruk e fedde hee. Ko kamɓe kadi kalfinaa yuurnitaade ɗaɓɓaande Tuunus waɗtude tawatoreede joɗle dental ngal kam e nanondiral gollondiral Muritani ɗaɓɓi ngal.
E ndee joɗnde 52ɓiire CEDEAO, Goomu kisal dental ngal toɗɗanaama hooreejo keso, hono Jean Claude Brou, kalifu mbaylaandi e oogirɗe Koddiwaar. Ko woni yeeso daɗaani gite.
Bookara Aamadu Bah
