Ñawoore hakkunde Noel Mameer e Muhammed Abdel Asiis, udditta ko ñalnde 13 mee 2014. Noel Mameer woni depitee Faraysenaajo takkunooɗo hooreejo leydi men wonde « mawɗo tarafikaaji dorog ». Caggal ɗuum, eɗen nganndi o etinooma, kanko tuubaako oo waɗdeede maslahaa, caggal nde o Asiis wullitii « bonnugol innde mum » to ñaawirɗe Farayse. Tuggi ndeen fayi jooni noon, huunde ndee wayliima no feewi, sibu geɗe keewɗe goɗɗe caaktaama jotondirɗe e ɗuum, ɗo innde mawɗo leydi ndii sowtaa.
CENI ina wiyi dak yimɓe politik
Alarba 22 mee 2013, rajo Nuwaasoot bisminooma Bereyka wul Mbaarek e Bilal wul Dik ngam faccirde wullitaango hardaneeɓe. Ko e ndeen yeewtere Bereyka wiyi wonde CENI kalfinaaɗo ɗowde woote garooje ɗee hoolnaaki sibu, yimɓe heewɓe jeyaaɓe e partiiji politik ganndaaɗi ina e makko.
Hananna e binnditagol
E wiyde Saaleh wul Hananna, gardiiɗo Haatem, nokkuuji keewɗi to bannge fuɗnaange leydi too, haa hannde njiyaani tawi wonnditooɓe saka mbinnditoo. O wiyi ko ɗi nokkuuji 9, jeyaaɗi e komin el Fullaaniya, tee woni caggal ɗum ɗoo ko geɗe politik. Ɗiin nokkuuji nii e wiyde makko mbayri wootde ko e kitaale 90.
