Ñalnde 14 mee, caggal nde debbo peewnoowo cuuɗi otel wullitii wonde gorko gooto yanii e mum. Ine wiyee wonde, nde o haalata ɗum ndee, hay gooto sikkitaaki mo, hakke no jangtawol makko ngol wayi nanndude e goonga. Kadi, hay so a yiyii mo tan, mbiyataa ko o neɗɗo juulɗo, mo a haandintaa e fenaande. Kadi, ɓe o gollodtoo ɓee fof nganndiraani mo caaysagaal. Yanti heen kadi, omo jogii dalillaaji memotooɗi.
Halfinaaɓe kisal otel oo, tawii e ɓale e peron suudu Dominik wonnoo nduu, kañtudi muuɗum. Ɗum noon, denndaangal geɗe gaddaanooje ñaawooɓe ɓee goongɗinde haala makko, e hiisde e nanngal gorko oo. Sibu, ɗoon e ɗoon, juuɗe makko mbaɗaa e geƴƴelle, fotooɓe ngari, portili mo, nate makko alaa ɗo kollitaaka e winndere hee, omo turi geenol, omo surwi, alla e gacce walla mette, ellee barɗo hoore. Haa ko won e jaayɗe e hoohooɓe Farayse ngoni e wiydė “ Ameriknaaɓe ina ɓurti golle ”, tee, “ ellee ñaawoore ko ko jaalɗini bonannde ndee e hoore Dominik ”. Enen weejniree nii, yeeso aduna fof : ɗum ɗoo ma a taw, ɓee ñaawooɓe ko yenanaaɓе ko debbo oo haali koo, ko goonga mo firtotaakо. Jaraani ko ɓe njokka hiisde e oo gorko, sibu debbo oo, meeɗii fende. Nii woni ɓe koybini nanngal makko, o natti reeneede, o tottitaa njuknaari makko. Enen fof ɗum ɓuri haawde, nde tawnoo en ngoowaani yiyde kiliifa potɗo nii, ina weejniree nii, yeeso aduna fof : ɗum ɗoo ma a taw, ɓee ñaawooɓe ko yenanaaɓе ko debbo oo haali koo, ko goonga mo firtotaakо.
Kono, eɗen keewi wiyde “ tuubakooɓe ko saaysayeeɓе ”. Ndeke ɗum haɗaani ɓe wiɗtude, wiiñde hanki e hannde oo debbo, yiylaade goonga, walla anndude jikku mum. Anndude mbele konngol makko ina foti huutoreede walla alaa. Lewru caggal ɗuum, ñalnde 1 sulyee 2011, ɓe mbiyi ɓe tawii, ko idii fof, ɓe nduttitii ko e yiɗde anndude no Nafisatu ardi e leydi Amerik, haa wonti Ameriknaajo e hitaande 2004. Nde o ɗaɓɓata ɗuum ndee, dalillaaji ɗi o rokki, ko wiyde wonde ko o jiyletenooɗo, o nannganooma, o fiyaa, o dummbaa to leydi makko, hono Gine. Caggal nde Dominik nanngaa ndee, nde o naamnaa no o wuurdunoo Gine, o haali ko jiidaa e ko o haalnoo e daɓɓаande o waɗnoo ndeen ndee. Tee o heɓtinii wonde ko o haalnoo ndeen koo, woodaano. Geɗel ɗiɗmel ngel, ɓe tawi ko e hiisaaji lempoo o fotnoo yoɓde, omo waɗi heen ɓiyngel sehil makko. Nde o daɓɓata hoɗorde ndee kadi, o hollitaani dañal makko fof. Geɗel tataɓel ngel, ko Nafisatu noddiino e telefoŋ gooto e sehilaaɓe mum. Kono, nde tawnoo oon sehil ko neɗɗo cokraaɗo tawreede fotde 190 kiloo marijuwaana (dorog), yeewtere maɓɓe nanngaa. Omo wiya oon, e fulfulde “ Hoto hul, oo gorko ina heewi jawdi, miɗo anndi ko mbaɗat-mi ”. Haa hannde kadi, e wiyde jaaynde “ New York Times ”, wiɗtooɓe ɓeе njiyii e binndi konte makko banke, ujunnaaje dolaar keewɗe na naati konte makko to Arizona, Géorgie, New York e Pennsylvanie. Tee ko kaalis ɗoreet ɗoreet wersaa heen e cili keewɗi, fotde 100 000 dolaar… heen gootol ummorii ko e sehil makko nanngiraaɗo dorog oo. Ɗuum addanii mo sikkiteede no feewi, sibu o wiyiino ɓe wonde o alaa dañirgal goɗngal ngal jiidaa e golle makko otel ɗee.
Haaɗaani ɗoon tan : o wiyiino kadi wonde gorko meeɗiino yande e makko to leydi Gine too, tawi woodaani. Tee jangtawol makko e ɗii ɗoo cili fof, ina ɗeɓi nanndude e goonga, sibu o wonata ko e woyde, haa ko hay gooto sikkittaako ko o haalata koo. Ɗum noon, ɓayri o meeɗii wiyde o yanaama, tawi ko fenaande, ndeke ngol ɗoo ne, hay so tawii ko seedtotoo ɗum ina woodi, hay gooţo goongɗintaa. Walla kam, ina naatna sikke.
Ko noon kadi hollitiraa o waylii haala hakkunde makko e Dominik. Ɗo idan ɗoo o wiynoo, ko caggal nde oon yani e makko, o yaltu o darii boowal haa mawɗo makko tawi mo ɗoon. Caggal ɗuum ɓe mbiyi o wiyii wonde, caggal nde oon yani e makko to suudu 2806 too, “ o yaltu, o fayi suudu woɗndu, o fitti ɗum, o ruttitii to suudu 2806 ngam fittude ɗum, hade makko haalande mawɗo makko ko kewi koo ”. Ɗoon ne kadi, wiɗtooɓe ɓee kuutorii ko coktirgal makko sulɗewal, ngam anndude hol suudu o naati, e hol ndeen. Tee, toon to Amerik, moyde goonga yeeso ɓee ñaawooɓe, jaggiraa ko no warhoore nii. Yanti e ɗuum, o wiyiino ɓe wonde, o jogii ko telefoŋ gooto. Kono jaaynde New York Times wiyii ɓe tawii e makko kaayitaaji kollitooji o huutoriima eddaaji joy telefoŋ. Ɓataake 30 suwee peeñninɗo denndaangal ɗee geɗe, wiyi kadi o moyii gonnga laabi goɗɗi keewɗi ko fayti e iwdi makko e ɗo o rewdaa haa ɗoo, ko fayti kadi e ko kewi jooni koo, kam e jotondire makko.
Nafisatu fof e moyde goonga, ñaawooɓe ɓee ina njenanaa geɗel : won ko kewi hakkunde Nafisatu e Dominik. Seede mum ina woodi, yeddotaako. Heddii ko anndude mbele Nafisatu ko porsaaɗo walla ? Ɗum fof e wayde noon, werlaade neɗɗo e kasoo e fawaade e haala neɗɗo meeɗɗo moyde goonga e cili keewɗi, mbar ko nuunɗal ? Enen juulɓe kadi eɗen nganndi no sariya Lislaam saɗtiniri dallingol geɗe bayɗe nii. Tawti ɗee geɗe fof, enen e koye men en ndoŋkii faamde, no neɗɗo mo welaaka huunde, jogiiɗo hunuko e juuɗe, yanirtee tawa wullaani, ŋataani ŋaacсаni, seekaani comci janɗo e mum oo, walla woppaani e mum hay aanoode wootere…
E oo ɗoo sahaa, alaa ko mbiyaten so wonaa ina waawi ittude neɗɗaagu haa laaɓa. Ɗum noon, reentaade ɗum ko huunde moƴƴere. Geɗel goɗngel na heen kadi : e yonta hannde oo, kala ko neɗɗo ina waɗa yo reento, sibu karallaagal yettiima e nokku ɗo telefoŋ maa, coktirɗe maa, faktiiraaji maa, ɗaɓɓaaɗe mbaɗno-ɗaa, konte maa banke, oto njolno-ɗaa, … fof ina waawi huutoreede ngam hoolkisaade ko njahataa, ko kaalataa e ko mbaɗataa. Ɗuum ko wonande yejjitooɓe wonde Alla kam humpaaka ko njahata kko. Neɗɗo yenanee kadi “ ko goonga tan woni ko wattinta ”, “ fenaande jogii tan ko koykon ko ƴeɓiri, kono alaa dote ko jooɗorii ”.
Bookara Aamadu Bah
Nafisatu Haalii !
Ñalnde alet 24 sulyee Nafisatu fellitii yaltude e haalde, caggal lebbi ɗiɗi i deƴƴere. Goo ko yimɓe ina ceedoo yeeso makko e jaayɗe e teleeji. O jangtiima no geɗe ɗee kala njahrunoo ñalnde 14 mee, nde o wiyi DSK yanii emakko ndee, omo haala, omo woya. Yeru o wiyi : “ njiɗ-mi ko o sokee. Njiɗ-mi ko o annda wonde ina woodi nokkuuji ɗo neɗɗo waawaa huutoraade mbaawka mum, ɗo waawaa huutoraade kaalis mum ”. Ɗum noon, yimɓe fof njiyii Nafisatu ɗo seedtotoo, ina holla no waɗdunoo e gorko oo. Jaaynooɓe ɓee noon teskiima wonde Nafisatu ko debbo timmuɗo, jom darnde e semmbe, kanko ɓuri DSK imawnude, ɗum noon omo waawnoo haɓtaade. Kono ɓe mbiyi o jaabii ɓe ! “ Mi yiɗaano gaañde mo ”. Ɗum fof ko hoto o yooɓtoreede ko ina waasna mo golle makko. Ko woni e lahal fof maa juuɗe njiytu !
