Kawtal Pelle Nuwaadibu yuɓɓinii ñalɗi pinal e nder wuro Nuwaadibu ñalnde 07/09/2007haa 09/09/2007 e ballondiral e Fedde sippirooji e pijirlooji Nuwaadibu. Kawtal Pelle ko fedde sosaande e hitaande 2004 e nder Nuwaadibu tawi renndini ko 21 Fedde: Bilbasi jowol, Tijjaani Aan, Fodoore Tooro, Maayata Sih, Gallunkooɓe, Sukaaɓe Mbotto, Looti Baabaaɓe, Sukaaɓe Kayhaydi, Dental Hirnaange Tooro, Sukaaɓe Mbaañ, Sukaaɓe Ceenel, Malisaajo, ASC Dental, ƴiɗɓe Baaba Maal, Biri Aali Jum, Sukaaɓe Foonde Jeeri, 9ellitaare, Alamari, Sukaaɓe Magaama, kam e Fedde Sukaaɓe Mbahe. Ardii Fedde Kawtal Pelle ko ƴero Caam, ardii Fedde Sippirooji e Pijirlooji ko Lih Muhammadu. Ko ɗee pelle ɗiɗi ndenti njuɓɓini ñalɗi tati pinal Nuwaadibu.
Ñalɗi ɗii udditi ko ñalnde aljumaa 7 settammbar, kikiiɗe, waktu nayaɓo to estaad Nuwaadibu. 7iɓɓe fulɓe alaa mo heddii. Ardiiɓe diiwaan o tawtoraama oo kewu. Adii fof ko Musiɗɗo men Najiiru Sih ƴetti konngol, Nde o joofni udditiraa ko aaye ɓuraana tawi janngi ɗum ko Ismaayiila ɓele. Nde ɗum yawti ko konngol hooreejo Fedde Kawtal Pelle hono ƴero Caam. O bismii denndaangal hoɗɓe ɓe, o holliti payndaale Fedde nde ko yiɗde renndinde pelle gonɗe e nder Nuwaadibu mbele ina njiyitondira, ngona neɗɗo gooto, liggondira… Caggal ɗum, konngol makko facciraa e Farayse mbele hoɗɓe ɓe ina paama haala makko. Nde ɗum ɓenni suka waali ƴetti konngol, salmini banndiraaɓe, holliti weltaare mum e teddinireede gardagol udditgol ñalɗi ɗi. Nde ɗum ɓenni ko seppo denndaangal nootitiiɗe e eeraango Fedde Kawtal pelle. Caggal ɗum ko jimol kawtal Pelle yuɓɓini ngam eeraade kala Fedde yo ar, damal ko ko udditii. Nde ɗum ɓenni, Addaahi, hooreejo rajo FM Nuwaadibu, mo nganndu-ɗaa kam wayli rajo FM Nuwaadibu, hokki heen leñol fof geɗal mum (fulɓe ina njogii heen jeewte joy) ƴettii konngol, salmini banndiraaɓe, wasiyii yimɓe ɓe yo nganndu leñol gootol jeyaa leydi ndi, jeyaa rajo FM Nuwaadibu, yimɓe fof ko gootum, alaa heedi heeda. Kanko fof wonde Aarabe, konngol makko ko e Pulaar o haali ɗum.
Caggal ɗum ko wejo ngam hollirde geɗe fuutankooɓe e yeeso hoohooɓe diiwaan Nuwaadibu. Kikiiɗe o, uddiraa ko geewu waɗooɓe karate e mbiruuji. Jamma ko hiirde pinal yuɓɓinaa to Sinimaa Jam-jam; caggal konngol musiɗɗo Sih Najiiru ngam bismaade hoɗɓe ɓe. Adii fof ko Jimol ngol goomu Pinal sukaaɓe Kayhaydi yuɓɓini, tiitoonde mum ko kawtal pelle, rewi heen ko Murtuɓe Leñol, ko jabbaaji mberlii heen daaɗe, rewi heen ko fedde ASC Dental yuɓɓini njalniika paytuka e SIDA. Fedde Bilbasi Jowol yuɓɓini kañum ne ko jimol ina yahdi e ngamri. Awluɓe Fuuta mbeddii heen daaɗe baɗɗe faayiida ina wondi e daartol Fulɓe. Fedde Sukaaɓe Daawalel yuɓɓini jimol ngol tiitoonde mum woni « 7iɓɓe Leydi Muritani ». Fuuta hannde, ko diɗɗal jabbaaji goɗngal, addii ballal mum. Fedde Pinal Sukaaɓe looti Baabaaɓe yuɓɓini ko jimol njalniika paytuka e dorog. Hiirde ndee uddiraa ko welnere naalankooɓe Nuwaadibu hono Goomu Faar Nuwaadibu, Aamadu Bah e Jibi jeŋ.
Ñalnde aset 08 settammbar, kikiiɗe, Ceerno men hono Abdullaay Elimaan Bah ɓurɗo lollirde Taaske, yeewtani yimɓe ɓe ko fayti e « jokkere enɗam ». Jamma o, ko hiirde pinal : jimol fedde pinal sukaaɓe looti Baabaaɓe fuɗɗoraa, tiitoonde maggol ko Sukaaɓe leydi am! Fedde Alsala yuɓɓini ko njalniika paytuka e uujo. Alsala ko fedde Sukaaɓe safalɓe nootitiiɓe e eeraango Kawtal ngal. Fedde sukaaɓe Magaama yuɓɓinii jimol, tiitoonde maggol fayti ko e dental. Fedde Sukaaɓe Mbaañ kam ne ko jimol ngol tiitoonde mum woni « dental gure men ». Fedde Bilbasi ruttii laawol goɗngol yuɓɓini jimol jahdungol ngamri. Fedde 9ellitaare hecciɗinii ɓerɗe kala hedtinooɓe ngol jimol, ngol tiitoonde mum woni « Ceerno Muhammadu Al Kabiiru Soh », ceerno men mo en njejjittaa e kala sahaa sabu golle e balle ɗe o gollunoo e Nuwaadibu.(Yo Alla yurmo mo, yaafoo mo, kanko e maayɓe juulɓe fof; aamiin). Fedde Ceenel yuɓɓinii jimol tiitoonde daartol mawɓe men hanki, gila e jaambareeɓe, almameeɓe haa heɓi seernaaɓe men hanki. Hirnaange Tooro addani yimɓe ko jimol hono Saydu kan maayaani, wirni. Yo Alla yuro mo kanko e maayɓe juulɓe kala.
Hiirde nde uddiraa ko welnere naalankooɓe wuro ngo, jirwini nde ko Aamadu Bah e Maasira Kone debbo jaareejo, Jibi Jeŋ e Awa Sek debbo gawlo. Ñalnde Alet 9 settammbar kikiiɗe ko yeewtere nde tiitoonde mum woni « Nguurndam neɗɗo e nder renndo », tawi yeewti ɗum ko Abdul Ajiiju Bah, gorko ngenndiyanke, laaɓtuɗo mo hono mum weeɓaani sabu darned makko e jaŋde pulaar e nder Nuwaadibu, golle makko e Fedde Ɓamtaare Pulaar ina ceedtini no feewi sanne kam e jeewte makko to rajo FM Nuwaadibu. Ñalɗi ɗii mbiliraa ko konngol hooreejo Fedde Sippirooji e Pijirlooji hono Mohammadu Lih. Caggal nde o salmini banndiraaɓe, o yetti yimɓe ɓe e darnde mum en e kawral mum en, o duwanii yimɓe fof nde Alla sellinta doole mum, moƴƴina baɗtane mum en, o ñaagii nde Alla nawrata ɗum yeeso.
Abuu Kan Nuwaadibu
