Ɓesngu Maafoondu yuɓɓinii ñalɗi pinal paayodinɗi, he nder waktuuji 72, tuggi 25 haa 27 juko 2024. He nder ɗiin ñalɗi, goomu pinal Maafoondu heɓii hollitde heen kala ko eɓɓunoo he ginol golle mum.
Ñalnde 25 ndee, golle ɗee udditiri ko Al Ɓuraana tedduɗo oo, he daande ceerno Yaayaa Taal. Rewi heen ko yimre ngenndiire he daaɗe sukaaɓe janngooɓe he duɗe leslese wuro ngoo, hade ɗiiɗoo konnguɗi : mawɗo wuro ngoo, hono Aadama Sal, mawɗo fedde sukaaɓe elewaaɓe wuro ngoo, janngooɓe to duɗe dowrowe e daande Muusaa Aamadu Aaw, meer komin Ɗalhaya e jeejegol hono Alhasan Jah, e bismaango goomu pinal Ɗalhaya e daaɗe lawɓe Maafoondu. Rewi heen ko seppo tawi ko jimol jahdinaangol daɗɗii, hade seppooɓe ɓee ardude gooto gooto. Beetawe oo joofiri jimol goomu pinal Ɗalahaya e ñaaƴo yontaaɓe rewɓe e worɓe. Kikiiɗo oo waɗi kaɗooje, toɓo hiiri toɓde. Jamma oo ko jalluɗi cerɓndam yuɓɓinaa.
Ñalnde 26 Juko 2024 dawraa ko ƴaro baali tuggi waktu 10 haa waktu 13 : cefe 8 baali ƴaraama he oon beetawe jirwuɗo. Aynaaɓe mawɓe, jiknaaɓe agaaɓe ƴariiɓe ɓee, kaali heen haala tiiɗka peewka, njuumtuka. Ɓe piri, ɓe pacciri ƴaro ngoo no haanirta nii, nde tawnoo baali ɗii kala peewii, sabu agaaɓe ɓee ko aynaaɓe tigi, so dognude baali kaarɗi, payɗi, jooɗɗi, peewɗi. Kikiiɗo oo ko fuku koyngel hiirdaa, kihondiral cehikaagal hakkunde kippu jeeri e kippu waalo. Kihondiral ngal gasiri ko ɗekko, kono tan bal jooɗɗo fettaama baŋ‐yoo‐baŋ. Jammaagu nguu ko hiirde pinal yuɓɓinaa, tuggi waktu 21 haa waktu 02 : mogooji, jime, pulareeje, ngamri kam e jimɗi jabbaaji teddiniraaɗi hiirde ndee, jabbaaji ɗiɗi ŋanaaji.
Ñalnde 27 ndee, subako oo ko pittee-pittee sukaaɓe ɓee ndawri. jammaagu nguu ko yeewtere tiitoriinde Nehdi e jaŋde, tawi ko sukaaɓe wuro ɗowi ɗum, hono Aamadu Dulo Soh, Umaar Maamuudu Aaw, Umaar Aamadu Bah e Maamuudu Ngaari Jallo.
Ciimtol Aamadu Dulo Soh
