Ñalnde hoore biir 9 lewru morso hitaande 2011, to wuro Nuwaasi le Sek, Jowol Sahre yuɓɓinii ñalawma pinal, e tawtoreede gure keewɗe. Fuɗɗi ko subaka waktu 10ɓo haa waktu 23ɓо jamma. Jowol noon so en kaalii ɗum alaa e sago kaalen to heedi. Pulaar wiyata hay mo sahre woni ko e leydi yiyaani mbaroodi, nanii ŋuraango mum. Jowol sahre Muritani e diwaan Gorgol, 18 km e Kahayɗi, wuro laamorgo diiwaan Gorgol. Wuro ngoo tiimi ko e maayo Senegaal. A ngo waɗi 14 580 aade, tawi ko Fulɓe e Soninkooɓe. Ko ngo wuro ndema e ngaynaaka e awo. So tawii ko to diwanuuji ganni ngo woni e diiwaan Ngenaar. So Jowol innaama noon, ko rewo e worgo fof, sabu ɓe kolliri, ko maayo sęerndaani ɗe. So a yiyii ɗee kaddule fuutankaagal a anndat Jowol sahre ko wuro pinal ! So a nanii ɗee jeewte, a laaɓete ndee sahre ko sahre ganndal. So a ndaarii ndee ndarnde a yenante Jowol ko sahre jaambaraagal. So ngaal jaambaraagal innaama, ɓerɗe koota e Baydi Maham Daawuuda, mo ɓe mbiyatnoo (fuybotaako) mo Sammba Gelaajo Jeegi wiynoo yo fuybo e weendu gawde. O wiyi : mi fuybotaako e weendu gawde sabu ɓiɗɓe ñoomankooɓe ko cooji ina mbaawi ñallude ñaamaani, kono mbaawaa ñallude kaalaani. Aɓe mbiyatnoo mo Wokkoo ɗalee; Jaaña wooree. Tawa en njejjitaa Mawndu Gaale. walla mbaamo, walla mbiyaa mo Mawndu Kummba Kaañaaɗi, kirtotonooɗo mata e ngaari, ruttoowaata wiya : ñaamaani. Farba jowol daartol yejittaa, farbaaji ina keewnoo Jowol nde tawnoo Farba ko lefol, kono oo ɗoo Farba Jowol mo kaaleten ko Farba Biraan Gaale Aamadu, oon Farba Jowol ko teskanooɗo e yonta Abdul Bookar kan, nde laamu Abdul Bookar liɓaa ko ndeen koloñal en ngari Jowol ngam nawde mo, ina cokaa mo, ko ndeeno o wiyi ɓe o jaɓii kono ma o yahda e Moodi Maham, ɓe mbiyi mo eey alaa baasi. Hol to o woni ? O wiyi ɓe ngaree mi holloyaa on mo, koo ɗoon ɓe mbaɗii pucci ɓe ngarii haa ɗoon. O wiyi ɓe ko ɗoo. Ɓe mbi koo ɗoon “ iih aan ɗoo ko leydi wonaa neɗɗo ”. O jaabii ɓe “ so ɗoo yahaani miin ne mi yahtaa”.
Geelel Kontee,
Ƴoogaa ko e www. yaakaare.com
