Lewru maa wirno e mbeelu jahdiiɗo mayru Ngaawe (Leydi) ñalnde 27 sulyee (morso). Ko ngool waɗtata laawol ɗiɗmol ko lewru ina nanngee e nder ndee hitaande 2018, kadi ko ngool hebori wonde nanngal ɓurngal juutde e nder duuɓi teemedere paaɗi (hakkunde 2 000 e 2 100), sabu maa ndu nannge haa laaɓa fotde waktu e hojomaaji 43, hade ndu woppitireede seeɗa-seeɗa. Ɗuum ina ɓadondiri e kaaɗtudi njuuteendi nanngal lewru, sabu ko nanngal juuti juuti koo fof, ɓurataa waktu e hojomaaji 47.
Naatgol lewru nduu e mbeelu leydi ndii haa yalta ko e waktuuji 6 e hojomaaji 14 timmata. Nanngal ngal fuɗɗotoo ko 17 :15 GMT, ɗuum noon ko adii mutal naange e yoga e leyɗeele hirnaange Afrik. Ko ndeen ndu fuɗɗotoo naatde e mbeelu Ngaawe (Leydi). So yahii haa wonii 19 : 30, ndu nanngee haa ndu timma (mbeelu Leydi wirna ndu kayru fof), ndu wojja coy sabu mayru lommbaade e mbeelu Leydi hee, ɗuum noon firti ko mutal naange to hirnaange Afrik hawrata ko e ndu nanngaa haa laaɓi. So naange mutii tan, ñalnde 27 sulyee 2018 ndee, mbaɗ-ten hakkillaaji men e fuɗnaage, maa en njiy lewru ina ummoo ina nanngaa, ina wojji coy !
Ko noon woorata haa waktu 21 :13, nde ndu fuɗɗoo fooynude seeɗa, ndu yaaɓana yaltude mbeelu Leydi, boɗewol ngol ustoo, haa ndu ɗaccitoyee haa laaɓa hedde 23 :28.
Boɗeyol lewru nduu ko batte kedde ciiñsiiñƴe naange naatɗe e faandu henndu Leydi, ɗeen ciiñsiiñƴe keltee haa leefa, sabu ina gasa ɗe kawra e duule e punndi Leydi, so ɗe njotiima Lewru, ɗe njottotoo ndu ko eɗe leefi eɗe ngojji, ko ɗuum wojjinta ndu.
Kadi tuma nde ndu nanngetee ndee, tawata ko endu lusoyii no feewi sabu yolnde hakkunde men e mayru maa wonoy 404 300 km, ɗuum noon ndu feeñata ñalnde nanngal ndee ko endu famɗi.
Hammadi Jah
