Kono ndeen tagofeere jeyaaka e yubɓo naange. Ɗum firti ko wonaa naange men ngee nde taarotoo, nde taarotoo ko hoodere woɗnde. Ko laanel wiɗto biyeteengel Kepler, yiyti nde e hitaande 2009. Tagopeeje bayɗe noon ngonii tati waɗde, nde annduɓe ngoongɗini. So a nanii tagofeere hoɗotoonde, firti ko won ɗeen geɗe ina tawee e mayre, kono firtaani nguurndam ina toon. Ina hasii tawaa ko tagopeeje goɗɗuɗe koode mum en (naange mum en) mbele ndiyam ina waawa woodde e mum en. Kadi, tawa nguleeki nokku oo e weeyo mum ina kenanii peeñgol nguurndam e ƴellitagol mum.
E oo sahaa, annduɓe ɓee mbiyi ina njenanaa tagofeere ndee ko nokku koɗotoodo. Kayre ɓuri leydi tekkude fotde laabi 2,4. Hakkunde men e mayre ko hedde 600 hitaande-annoore Hitaande annoore = 9 467 milyaar kiloomeeteer) ɗum noon, hakkunde men e mayre ko hedde 5 680 000 miliyaar kiloomeeteer ! ! !.
Nde taarotoo naange mayre ko e nder balɗe men 290. Nguleeki dow mayre woɗɗaani 22°C. Annduɓe ɓee nganndaa tawo so tawii woni e mayre ko kaaƴe walla gaasuuji walla diƴƴe. Laanel wiɗto Kepler werlaa ko e hitaande 2009, tee, alaa ko ngel halfinaa so wonaa sunnaade fotde 100 000 hoodere, koode nannduɗe e naange men ngee, ngam ƴeewde so alaa tagopeeje guurotooɗe taarotoo ɗum en. Nasa yiytii tagopeeje potɗe e Leydi mawnude. Ko noon kadi NASA habriri ñalnde talaata 20 desaambar 2011, yiytii tagopeeje ɗiɗi inniraaɗe Kepler20e, e Kepler2f, ɗe mawneeki mum en debi fotde e leydi men ndii, kono ɗe njeyaaka e yuɓɓo naange men ngee kadi. Kono kadi, nde tawnoo eɗe ɓallii no feewi naangeeji (koode) majje, nguurndam aabnotaako e majje. Ade nguli no feewi : nguleeki dow heen wootere ko 760°C, dow ndeya ko 425° (Dow Leydi men ndii, 100°C fasnata ndiyam).
Bookara Aamadu Bah
