Ko ɗum woni ko ɓe kolliti ñalnde 17 abriil, nde ɓe mbaɗi batu mawngu ngam haalde ɗum e hollitde mettere maɓɓe. Hol ko addi haala? Addi haala ko juppugol diƴƴe kuutoraade (diƴƴe wuro Ndakaaru) e tufnde Kammboreen, nokku maɓɓe. Ko almaami Mbay Gey ari yettinde konngol Mawɗo Laayeen en (Kaliif maɓɓe). Owiyi : “ Kaliif jaɓaani, weltaaki e ɗee golle. Ɗum ko tooñannge mawnge. Ko goonga ko waɗatnoo waɗii, heddii ko yo safre. So tawii kadi won feere ƴettetee, yo annde kadi min tampii, alaa fof caɗeele ɗe min njiyaani ”. Ɓeydi mettere maɓɓe, ko hay nokku ɗo kaliifu maɓɓe gadano lelii ɗo, wonotaako sabu luuɓeeki diƴƴe. Aññeere (rawda) oon woni ko e daande geec, sara ɗo diƴƴe ɗe njuppotoo ɗo. Ko ɗum addani biyetteɗo Libaas Haan, goo to e hoohooɓe maɓɓe wiyde “ hol cuusɗo ƴettude diƴƴe saltee Jurbel yuppoya ɗum Tuubaa… Hol ko tagi diƴƴe saltee Ndakaaru ina njuppee e Kammbureen? Feere ina waawi dañeede ngam safrude ɗum ɗoo ”.
- Advertisment -