Hannde, nguu ɗoo laawgu, oo fitina, ɗee pelɓondire bonɗe e barondire nana nguɗa leyɗeele juulɓe. Hol ko saabii ɗum ? Sabii ɗum dey ko to Kaliforni (Amerik), neɗɗel jaasngel, ganndiraangel nguyka, woodii ɓe yoɓi 75 dolaar (ujunnaaje noogaas mbuuɗu) ñalawma fof, yo ngar galle mum ngam waɗde sinemaa mo jotondiraani hay baɗte e Lislaam. Caggal ɗuum, o wayli haala maɓɓe, o lomtiniri ka konnguɗi goɗɗi, o waɗti ɗum filmo bonɗo (eɗen moolii heen Alla) jalkitoowo nelaaɗo Muhammed. Caggal ɗum o yeeyni mo, kono hay gooto nootaaki mo, waɗtaani e ko o waɗi koo hakkille. Ndeen, o itti e filmo hee taƴre 14 hojom, o yolli ɗum nder Youtube, nder internet. Ɗoon ne kadi hay gooto waɗtaani heen hakkille.
Caggal ɗuum, e yontere ɓennunde ndee, gaño lislaam gooto to Virginie, yolliti kadi wideyoo oo e internet, kono ngol ɗoo laawol, omo firaa e Arab, o neldi jokkorgal ngal saaysayeeɓe woɗɓe e jaaynooɓe to Misra. Tele Misra yaltini heen huunde. Baɗoowo politik gooto ñiŋi ɗum. Diiniyankooɓe laawii.
Ɓe noddi seppo rewrude e Facebook et Twitter, ngam yande e ammbasaad Amerik to Keer. Fitina oo reɓi. Ammbasadeer Amerik to Libi waraa heen, cumu jaɓi, reɓi haa e leyɗe goɗɗe. Nde fitina oo fuɗɗii tan, kanko puɗɗunooɗo wideyoo oo, o wiyi ko o yahuud israayiilnaajo, tee ko yahuud en woɗɓe ndokki mo kaalis. Kono o fen. Jooni kadi o wiyi ko o kerecee kopto, hay so tawii noon kopte en to Misra ina ngañi gollal makko ngal tee njiɗaa fes ɓallaade mo.
Ɓe ndañii sago maɓɓе Gooto e sikkaaɓe mballitiino mo ɓее, wiyi ko neɗɗo diine budaa. Hay so tawii filmo oo waɗaa ko Amerik, to Sudaan, seppooɓe ɓee njani ko e ammbasaad Biritaan, e Almaañ. Woodi Misranaaɓе kadi yanɓe e ammbasaad Holande, sabu maɓɓe sikkude ko Pays Bas woni caggal filmo oo. Gooto fof ina yiyloo mo takki e mo yani. Faandaare waɗɓe filmo oo ko yiɗnoode hollitde wonde Lislaam ko diine neegre. Hannde ɗii ɗoo seppooji e njannguuji ngonanii ɓe daliilu. Baɗɗo filmo o wiyii wonde “ juulɓe tagraa ko ñaadre e warhoore ”. O wiyi kadi “ fitinaaji baɗɗi Misra ɗii kollitii no diine oo e yimɓe mum mbayi neegde, ɗum goongɗinii ko filmo oo haali koo ɗum noon ina wayi no seppooɓe ɓее badi tan ko ko waɗɓe filmo oo njiylotonoo koo.
Demokaraasi e karallaagal waɗboniiɓe ɓee ndartotaako ɗoo, ɓayri ɓe njiyii eɗum metta juulɓe, ñalnde kala maa ɓe mbaɗ ko ɓe cikki ina muusa ɗum en (añɓe Alla). Tee, e nder leyɗe mawɗe ɗee, sariya haɗaani ɓe ɗuum, sibu gooto kala ina wellitaa haalde ko welaa. Hay so sariya harmiinoono ɗuum ne, karallaagal yettiima ɗo hay gooto waawaa hadɓe ɓe yollude e internet ko ɓe nijidi koo, tee mumtotaako. Kanko baɗɗo filmoo oo, ko o pawanooɗo nii kuugal sabu nguyka, ɗum noon o alaano hakke huutoraade ordinateer boom saka internet tawa o yamiraaka. Kono en njiyii ɗuum dartinaani mo.
Ɗuum haɗaani baɗtanɗo mo filmo oo e ɗemngal Arab oo, yollitde wideyoo oo e internet e sarde ɗum caggal leydi. Parbagaan cooyniijo jeyaa ko e mbaydiiji wellitaare miijo e haala hannde. O yerondiri kadi ko keewtugol warngooji. Warde neɗɗo meeɗaa wayde nii newaade. E nder leyɗe juulɓe, warooɓe ɓee korsini ko bommbooji, tee ko yimɓe heewɓe ɓe mbardata laawol gootol. To Dental Amerik, ko petelaaji ɓe ɓuri horsinde. To Japon ko gaas sarin. Ɓe kuutorii ko engere e njanngu Oklahoma City. Ñalnde 11 settaambar, ownooɓе ɓeе kuutorinoo ko laɓɓe e diwooje nawooje yimɓe. Caggal ɗuum kadi ko ɓatakeeji loowaadi anthrax. Jalkito kadi ɓuri saɗde faddaade. Sabu kuftodingol karalleeje limrewal e internet, neɗɗo ina waawi sarde wideyoo nder winndere ndee kala e mudda gooto, tawa ko gaybinooje diine baawɗo wonde kala.
So on mbelaaka, bommbo oo kalittaa wideyooji ɗii ina mbaawi wontude kaɓirɗe bonɗe. Kono kadi, eɗi njogii njaafndi : fof fawii ko e mon. Ko onon ngoni pettinoowel ngel. So on njaɓaani, bommbo oo kalittaa. Ɗum ɗoo toɗɗaaki juulɓe tan, hay so tawii, e ko wattindii koo, ko kamɓe ɗum ɓuri joopaade. Wideyooji ƴattotooɗi diineeji ɗii kala ina tawee e nder Youtube : ƴattotooɗi yahuud en, kerecee en, hinndu en, katolik en, mormon en, budaa en, e goɗɗi kadi. Ina waɗi heen ko kilipaaji jalkitooji. Ina waɗi heen ɓurɗi nefnaade. Keewɗi heen njolliraa ko ngam felɓondirde enɗameeje e leƴƴi. Ɓee wanndotooɓe mbaɗataa ceerungal. Jaltinɗo filmo bonnitoowo Muhammad (Muhammad mo jam e Kisal ngoni oo) ina sosi kadi goomu ceppoowu sahaa e sahaa kala nder juulirɗe mormon en.
Gaawgol ngañgu e warngooji nattataa so tawii oɗon mbeebiri nii rullinde e yaawde memde ceŋdi. Gaywingol nulaaɗo mon e nder ordinateer baawɗo wonde kala, jokkiiɗo e internet, ina foti nattude waɗnude on ko on njiɗaa. Ko noon kadi pot-ɗon saloraade rewde won koon ndiiniyankeewon nguurtowon on e neegre. Njoɗɗinee kaaƴe mon, ngartiron hakkillaaji mon ! Kootee cuuɗi mon, paatee juulirɗe mon, njuulon. Alla ina mawni no feewi. Ndewee mo, ceerton e seyɗaane.
Tayre e winndannde William Saletan, in » Film anti-islam : chers croyants, ignorez les vidéos d’abrutis surInternet ! »
Firo Bookara Aaamdu Bah
