Daartol garowol ɗoo ngol hecciɗinii ɓernde am no feewi sanne. Ndeke mi anndii hay gooto fotaani famɗinde yurmeende Alla e hattan Mum, sabu hay gooto anndaa to nde ummortoo, e no nde ardata.
Suka gorko gooto, neene mum lelinooma rafi cellal, haa nawaa lopitaal, doktoreeɓe ina cafra ɗum. O nawaa to safrooɓe heɓɓittooɓe rafaaɓe tampuɓe. Balɗe seeɗa caggal ɗuum, safrooɓe ɓee pelliti haalande suka oo goonga, mbiyi ɗum : “Neene maa, min ɗamtindiima waawde safrude ɗum, omo waawi nootaade Joomiiko ko neeɓaani. Min ngaandii e rafi makko hee.”
Nii woni, kanko suka oo, o yalti lopitaal oo, omo wondi e ɗamtindaare mawnde. Nde o ƴettiti laawol, omo arta ƴeewtaade neene makko ndee, o dartii he yeeyirde esaas, ngam soodde. Tawde, won gadiiɗo mo ɗoon, o woni e fadde ɗum, haa gasna loowde. Ɗoon tan, o weddii ndaarɗe makko, haa poti he ullundu jibinndu, ko ɓooyaani, ɓikkon mum ina ngoni e nder kartoŋ. Kon ɗeɓataa hay waawde yahde. O miijtii, kanko suka oo : “hol ňamminoowo kon ullukon e oo sifaa no ngoniri nii ?” Nii woni, o tiindanii yeeyirde wonnde sara ɗoon ndee. O soodi pot liɗɗi gommbaaɗo. O wowtani ullukon kon pot oo.
Caggal ɗuum, o tiindanii lopitaal, ƴeewoyde no neene makko woori. Nde o naati to ñawɓe tampuɓe ɓee paabetee too, to o ɗaccunoo neene makko too, o tawtaani toon neene makko. O gidaa, manayel ngel o joginoo e junngo makko ɓoccitii, sami. O heñii o hocci, kono faayre ndee iwaani, o naamndii debbo cafroowo oo, to neene makko woni, o wiyi : “Hol to neene am woni ?” Oon jaabii mo, wiyi : “Jooni dey, yettere Alla, o semorii no moƴƴi, min ngegginii mo ɗoo, min nawii mo suudu semoranaaɓe, rewndu e nduu ɗoo nduu”.
O waɗi taaɓe jaawɗe, o tiindii to neene makko. O salmini ɗum, haa saɗi joofi, o naamndii ɗum no dañri jam. Yummiraaɗo oo heɓɓitii, wiyi : “Tuma nde ngonnoo-mi hakkunde nguurndam e maayde ndee, mi anndaa nano am, mi anndaa ñaamo am, e oon sahnga, njiy-mi ko ullundu e ɓikkon mum ina kooyni takkon mumen dow asamaan ina nduwanoo mi cellal !” Ɓiɗɗo oo mugaa haa ko foti alaa. Haa wayi no gidaaɗo nii ! O nawti laamu to Alla, baɗoowo ko welaa, ɗo welaa, nde welaa e no weldaa. Kattanɗo huunde fof oo ! Senaade woodanii Alla, Mo njurumndeeru huuɓtidini fof ! Jettooɗe ngoodanii Alla !
Ndeke ittude sadak ina riiwta woroddeeji, juutna balɗe, ɓeyda yaajeende, e ballal Alla.
Banndiraaɓe am, musidɓe tedduɓe, cafriree rafiiji mon sakkaade :
Ɗoo ko sadak potyel liɗɗi gommbangel tan, cakkangel ullukon haa fittaandu daɗi. Taaree Alla, Gooto e Laamu mum !.
Annabiijo Alla (JKM) wiyii : “Ndaɗndiro-ɗee e jeyngol Jahannama, hay so ko feccere tamaroore !” Senaade woodanii Alla !
Laahilaaha Illallaah ! Deweteeɗo e goonga alaa, so wonaa Alla ! Eeh Alla !, Joomam ! hoybinan teddeendi nguurndam aduna oon ɓenninɗo oo waaju !
Jippinɗo : Usmaan SEK
Firo : Aamadu T. Siidi Bintu Shariif, winndiyanke.
