Yo yimɓe njanngin he duɗe Pulaar ɗee ngoƴaaji renndo ngoo e banngeeji kala : ngoƴaaji to bannge jaŋde. Holi tippudi nehdi e jande mbaawndi faggoreede ɗemngal neeniwal e nder nokku ɗo ngal janngintee ɗoo to banngal : Hiisa, to banngal puɗi e kuuɓal, to banngal poñɗi e kuuɓal,to banngal coñce e kuuɓal, to banngal ndema e ngaynaaka e awo e sato e fitiramngollaagal e karallaagal e njulaagu e cellal e weeyo haa jofi. Tawa binndanɗe ɗee ina ƴooga he ɗeen lowe ɗe renndo ngoo waawi wallitoraade e jeese kala, e ko ina hattani feewnude e ɗowde ngo faade e ko ina ƴellita ngo he banngeeji nafooji ngo e kuuɓal.
Jannginoowo wata teppo, yo o ɓulno miijooji e peeje; wata o yowito tan e ko woɗɓe peewni walla mbinndi e defte, tawa kuɓindaaki walla nganndaa soklaaji nokku oo tigi tigi, sabu waasde wonde ɗoon. Yo anndan hoyre makko, o fawoo e ɗuum. Ko ndeen o ɓurata dañde njeñtudi moƴƴiri, sabu jaŋde ko loowdi ndi jannginoowo loowata e hakkillaaji ɓe jannginta ɓee, fotii ko ɓe doofooli walla ko ɓe mawɓe. Yo o hirjin ɓe e holkisaade e wiɗaade, ngam feewnude huunde hesere walla dañde huunde hesere. Sabu Pulaar wiyi ko « Ganndal woɗɗaani, wirni ». Ko wirnii noon, ko maa yiylee nde yiytee.
Sileymaan Kan
