Caggal nde jokkondir-ɗen e Iisa Baal, en njeewtidii kadi e ɓiyiiko ñeeñɗuɗo kañum ne.
Fooyre Ɓamtaare (F.Ɓ.) : Haalan janngiyankooɓe ɓe mo woni aan ?
Umaar Baal : Innde am kaayitaaji ko Sammba Jallo Baal. Ɓur-mi anndireede ko Umaar Baal. Njibinaa-mi ko 1985 to Baabaaɓe Looti. Ko toon njanngu-mi Ŋuraana, naat-mi toon lekkon, e duɗal ƴeewndorgal Pulaar ngal Duɗal Ɗemɗe ngenndiije Muritani. Mi janngii haa tolno joyaɓo. Nde keɓ-mi duuɓi sappo e joy ngardu-mi ɗo e nuwaasoot e jinnaaɓe am.
F.Ɓ. : Hol no naatir-ɗaa e ñeeñal?
U. Baal :Tawru-mi ñeeñal ko Baaba am! Omo fota yimɓe, omo nata, omo natira pentiir (natgooguyaagal). So omo golla ngonat-mi ko sara makko mbiɗo ƴeewa ko o gollata koo fof. Mbaɗtu-mi ñemmbude mo, o waɗti sahtaade ko ngollat-mi ko. Nii woni ngon-mi heen haa mbaɗtu-mi miijanaade hoyre am, mi nata; ko nii naatir-mi e ñeeñal!
F.Ɓ. : Hol no njiyru-ɗaa golle ñeeñal?
U. Baal : Ko huunde nde njiɗ-mi sanne, ɗum tagi hay dara mi waawaa jillinde heen. Ko gollal no golle ɗee nii fof, ina wuurna, ina holtina, ina weltina.
F.Ɓ. : Mbele a fuɗɗiima anndeede e renndo natgoobooɓe?
U. Baal :Mi fuɗɗiima anndeede sanne, sibu miin e Baaba am min mbejdii ɗo e Nuwaasoot, e nokkuuji keewɗi, lolluɗi. Mi yaltii Muritani ngam wejoyde to leydi Farayse, mi yahii leydi Almaañ, mi yahii laabi ɗiɗi wejoyde leydi Espaañ.
F.Ɓ : Hol ko mbasiyto-ɗaa gollotooɓe ko fayti e ñeeñal?
U.Baal : Mbiɗo wasiyoo ɓe e golle maɓɓe ñeeñal, nde ɓe mbaɗata heen pinal ngal.Yo ɓe njaggu e maggal, ɓe tiiɗnoo heen, ɓe mawnina ɗum. Sibu so neɗɗo alaa pinal walla ñeeñal, oon alaa ko woni. So neɗɗo toppitaaki pinal mum yahataa hay nokku. Ñeeñal men ko kaɓtorgal men, ko daɗnorgal men, tiiɗno-ɗen heen enen kala mbele njahren yeeso, sibu so en njiyii leyɗeele tuubakooɓe ina njahri yeeso, ko sabu mum en toppitaade pinal mumen.
Mammadu Maamuudu Baal &Daawuuda Bah
