Yummum rewɓe hesniiɓe e baayeeji yahii, Yo Alla moƴƴin jaaƴnde.
Neen Huley Sammba Sal sankiima ñalnde alarba 21 juko (ut) 2024. Huley Sal ko yumma mum liyetnaa Sal Abdullaay Muusaa (Yo Geno suddu mo yurmeende mum), gooto e kooninkooɓe ɓaleeɓe ɓe yahdiiɓe mum en nder konu Muritani mbardunoo amdu e fenaande e kitaale 1990-1991.
Neene Huley Sal alaa fof ɗo haɓaaka, alaa fof ɗo yahaani, ngam yo goonga feññine haa anndee no ɓiyiiko e denndaangal waranooɓe ɓee mbardaa, warnooɓe ɓee ñaawee. Alaa fof kadi ɗo laamu Muritani rewaani ngam fuuntude mo kanko e yahdiiɓe makko nder fedde maɓɓe Haɓɓere Rewɓe hesniiɓe, e jarriboraade ɓe jawdi, mbele aɓe ndeƴƴa, ɓe natta haalde haala ñaawoore e njiylawu goonga.
Huley Sal ko neɗɗo korsinɗo yimɓe, kala mo omo nodda, maa o jooftina ɗum he kaariyel am, neɗɗo fof o noddirta ɗum ko innde korsa.
Fooyre Ɓamtaare e Fedde Ɓamtaare Pulaar he Muritani no ndiidorinoo ine nduwanoo ɓesngu makko e denndaangal haɓantooɓe goonga, jokkuɓe ɗaɓɓude laaɓal, nde Geno yurmotoo mo, yaafoo mo, naatna mo Aljanna. Aamiini
Seedantaagal Aysata Jaari Sal faade he neene mum Huley Sal
Huley Sal tuttii he joomum ko ɗoo he Nuwaasoot ñalnde 21/8/24. Ko ɓiyiiko waranoo e hitaande 90 to Inaal. Neene Huley ko debbo pelluɗo jihaadi, daranii ñaawoore, tee wonaa ɓiyiiko tan o daraninoo, o daraninoo ko ɓiɓɓe leydi ndii fof. Kala baranooɗo omo daranii jooltugol hakke mum. Ko o ngenndiyanke, juulɗo, nuunɗuɗo, laatiiɗo gertogal kippinoongal he ɓesngu mum, ɓesngu leydi ndii kala. O daraninoo ko yo laamu ñaaw warnooɓe ɓiɓɓe yummiraaɓe mum en koninkooɓe e dow fenaande.
Debbo dimo, ngenndiyanke, tuɗɗiima leydi, yo leydi tuɗɗu mo leppi teddungal. Yo Alla yurmo mo, yaafoo mo, haarna mo aljanna. Neene Huley Sal ko neɗɗo jurum deero, korsinɗo yimɓe : kala mo omo nodda, maa o jooftina ɗum he kaariyel am, o noddira ɗum innde korsa.
Yo Alla rokku yahdiiɓe makko doole jokkude hare makko ndee haa ñaawoore warnooɓe koye ɓee waɗee, goonga laatoo. Aysata Jaari Sal cukko Fedde rewɓe waranaaɓe
