FB 42, en njiyii peeje ballitooje neɗɗo yiytude laawol walla anndude ɗo woni. En limtii heen huutoraade koode, walla gollorɗe ɗe aadee feewni hono busol e GPS. En mbiyiino wonde e aduna hannde oo kaɓirgal ɓurngal newaade ngam wallitde neɗɗo anndude ngonka mum, walla laawol mum wiyetee ko GPS.
Hol ko GPS hokkata neɗɗo haa anndina ɗum to woni e dingiral winndere nde ?
Jaabawol : GPS hokkata neɗɗo ko jurannde e Rorannde. Kono nde paamaten ɗum, alaa e sago ngannden : 1) hol no Leydi eƴɓinirtee walla natirtee ? 2) hol diidi teeŋtuɗi e Leydi : hol ko woni jurol e ŋorol ? 3) hol ko woni ŋorannde e jurannde ?
1. HOL NO LEYDI NATIRTEE ? En nganndii wonde Leydi ene murliɗi, te eƴɓinde (natde) ɗum ina hitti seeɗa. Waawata jogaade mbaadi Leydi tan ko natal fuku, walla mbeɗu. Kono hay gooto waawaa wiyde nde ummii fof, ina ƴefta fuku leydi, weelnoo ɗum, yahda heen, alaa noon ko haali wiyde ina waɗa ɗum e jeyba (jiifa). Ko ɗee caɗeele ngaddani haralleeɓe e annduɓe ganndal leydi waɗde natal Leydi bertingal, ngal murliɗaani ; walla kadi waɗde natal Leydi bertingal tawi ina jogii mbaadi murliɗndi. Eɓe njoganii ɗum peeje keewɗe, kono ɓuri heewde huutoreede ko nate bertiiɗe, kollitooje e nder mum en denndaangal leyɗe winndere nde fof. Ko e nder nate he diidi teeŋtuɗi ɗi njannguno ɗen e dingiral Leydi kuutortee no haanirta nii. (ƴeew FB t° 40, hello 4) .
2. HOL DIIDI TEEŊTUƊI E LEYDI :
HOL KO WONI ŊOROL E JUROL ?
En njanngiino diidi teeŋtuɗi e Leydi ; ƴeew FB t° 40, hello 4. En mbiyiino ɗi ngoodaani, ɗi njiyetaake e leydi, ko e hakkille tan ɗi ngoodi walla ɗi mbaɗaa, ɗi miijaa. Kono eɗi keewi nafoore e nder ganndal leydi : heblude nate, e anndude waktuuji e winndere he, e waawde ɓetde Leydi, e wallude eyiytude majjuɗo, e hollude majjuɗo laawol, e anndude nokku kala ɗo woni e Leydi, ekon.
HOL DIIDI TEEŊTUƊI E LEYDI ?
Diidi teeŋtuɗi e Leydi ɗi njiyno-ɗen, kollu ɗen ngonka mum en ko ɗiiɗoo :Ŋorol Peccol ; e Ŋorol nguleeki dow; e Tigilde dow ; e Ŋorol nguleeki les, e Tigildeles. Ɗii diidi limtaaɗi ɗo fof ko ŋori mbiyetee (teelal ko ŋorol). Woni ko en njiyaano tan e diidi teeŋtuɗi ɗi ko juri (e teelal ko jurol).
HOL KO WONI ŊOROL ? :
Wiyetee Ŋorol ko diidol murlol taarotoongol Leydi, tawi ina sawndii Ŋorol Peccol : woni e Leydi ko ŋori teemedere e capanɗe jeetati (180). Ko nii ɗi peccorii e Leydi : – to bannge Rewo(Dow), hono Feccere Fuku Leydi Dow : woni heen kocapanɗe jeenay (90) ŋorol. Ŋori 90 rewankooje ɗe tuggi ko e Ŋorol Peccol haa yettii Wuddu Dow (Rewo). Ŋorol Peccol woni tuugorde majji, kam woni Ŋorol Wolum (0), maa dara. Ŋorol Wuddu Dow woni haaɗtirde majji, kam woni ŋorol 90 hol to bannge Rewo. – to bannge Worgo (Les),hono Feccere Fuku Leydi Les (Worgo) : woni heen ko capanɗe jeenay (90) ŋorol. Ŋori 90 worgankooji ɗi ne tuggi ko e Ŋorol Peccol haa yettii Wuddu Les (Worgo). Ŋorol Peccol woni tuugorde majji, kam woni Ŋorol Wolum (0), maa dara. Ŋorol Wuddu Les woni haaɗtirde majji, kam woni ŋorol 90 ɓol to bannge Worgo. Nii woni seerndi Ŋori ɗi tan ko ɗii ko rewankooji, ɗii ko worgankooji. Ŋorol fof anndirtee ko limoore mum, ɓeydee heen ngonka mum rewo maa worgo.
3) HOL KO WONI JUROL ?
Wiyetee Jurol ko diidol murlol taarotoongol Leydi, tawi ina rewi e Wuddu Leydi Dow, e Wuddu Leydi Les. Woni e Leydi ko juri teemedde tati e capanɗe jeegom (360). Jurol tuugorde nde (Jurol Wolum (0) maa dara) wiyetee ko Jurol Girinicsabu ngol rewi ko e wuro Girinic, e leydi Engeleteer, ko ɓeen njiyti, pewji ɗum. Ko nii Juri ɗi peccorii e Leydi : – to bannge Funnaange Jurol Girinic : woni heen ko teemedere e capanɗe jeetati (180) jurol ; ɗi tuggi ko e Jurol Girinic (woni Jurol Wolum) haa yettii Jurol 180 Wol. – to bannge Hirnaange Jurol Girinic : woni heen ko teemedere e capanɗe jeetati (180) jurol ; ɗi tuggi ko e Jurol Girinic (woni Jurol Wolum) haa yettii Jurol 180 Wol. Seerndi Juri ɗii ne tan ko ɗii keeɗti ko Funnaange Jurol Girinic, ɗiya ne keedti ko Hirnaange Jurol Girinic. Jurol heen fof anndirtee ko limoore mum, ɓeydee heen ngonka mum bannge Funnaange, walla bannge Hirnaange Jurol Girinic.
Aamadu Umar JAH
