Aamadu Koli ko ganndo jaraale tigi rigi, nde wonnoo ko o jiiliiɗo ngam yiɗde anndude. O yennataa hay gooto, hay bonɗo e makko. O yimataa kadi hay gooto, hay moƴƴuɗo e makko. Kala mo o eerii tawata ko tiitoonde e nder nokku walla jontaaɗo jamaanu, fotii omo anndi ɗum walla o heɓaani anndude ɗum. Njimri makko ƴoogata ɓulno mum ko e nehaande giɗli, ŋari ƴellitiindi, ŋari leydi, tule ceene, kaaƴe, dulɗi (dunuuli), caaɗli e maaje (hayngo e doongo, lugge e jiriide) ɗo o duudaani kolaaɗe jeeri e waalo e pale. Omo yima baaruuji keewɗi kono o ɓuri anndireede ko ɗii ɗoo :
Palol daande maayo
Won wiyooɓe ndi debbo ƴella walla debbo Lingeeri. Aali Hammadi Aali noon inniri ndi ko Debbo Rewo (innde puccu mum njarlu).
Leele : Sooraawo, Juli, Miijo ɓernde
Gumbalaa : Omo yima kadi pekaan e denndaangal njimri lollunoondi e nder reedu Fuuta, ndi o hawrunoo.
Golle goɗɗe : Ko goonga, Aamadu Koli anndiraa walla dowliri ko naalankaagal, kono wonaa naalankaagal mehal tan o jooɗtorii. Naalankaagal ko huunde haawniinde, kala ko tawi e golle joom mum waɗatnoo adan, wirnat. Ko naalankaagal ngal tan hankadi yiyetee walla haaletee. Kono Aamadu Koli ko gawoowo malaaɗo waatiinde. Omo seedtanaa kadi marde ganndal keeringal e waawde nooroo. Pille mum ena keewi sabu o waɗdaama golwole laaɓtuɗe ɗo diiwaan Tokomaaji ɗoo, e tawtoreede Maddel Sal. Moolo makko oo, ena jogii, kañum ne, nafoore woɗnde ko wonaa tan hoɗireede so omo yima. Ko o tiimruɗo sahtu nde faayre hoɗii mo.
Tonngol : Aamadu Koli Mammadu Jaaltaaɓe walla Aamadu Aystel Booy Siree wuuri ko duuɓі 71. E nder ngal daawal, ngal Geno rokkunoo mo, o waɗii heen naalankaagal ceningal, ɓamtungal Leñol. O reeni ngal no feewi, o reentii ngal. Ko ɗuum Waɗi, o dañi heen teddungal e martabaaji keewɗi, ɗi limdotaako. O wuuri heen, o wuurni heen. Naalanke fof, mo o yontidanoo ko e sehilaaɓe makko jeyaa. Kala heen mo o hawritnoo e nokku, o ittanii ɗum geɗal. Omo waawi wasoraade wonde o dañii ko naalankooɓe heewɓe ndañaani e nder nguurndam mum en, so maaydude e daande makko.
Rokki mo oon fartaŋŋe ko wodaaɗe won e geɗe. Haa o maayi, o ñaamataa maafe, o memataa nebam sirme. O wiyi ɗeen geɗe, ko e loornooje daande njeyaa. Eɗen njetta jinnaaɗo men Maajuuba Cub, mawni men Kummba Aamadu Koli, sehil men Ɗaahiiru Aamadu Koli e miñiraagel men Ifraa Aamadu Koli sabu wallude en laaɓtinde won e inɗe. Eɗen mbiya, ɓe njaaraama. Eɗen kesɗitina duwaawu feewde e ɓesngu makko e kuuɓal : Tiggere Siree, ɗo o ari e aduna, o daasi mbootu makko e Tokomaaji, ɗo o wuuri haa o ruttii e joomiiko ɗoo. Eɗen nduwanoo denndaangal mo moolo walla daande Aamadu Koli Sal weltinta e dow laral leydi ndii haa teeŋti e Aamadu Yaayaa Leli Jallo mo Jowre Sahre, wuro ngo wajjuɓe ndeeni. Yo Geno waɗ mo ɗo waɗnoo mаауɓе malaaɓe.
Njaay Saydu Aamadu Lollirdo Gelongal Fuuta
