Ñalnde 14 mbooy (mars) 2023 Fedde Ɓamtaare Pulaar he Muritani udditii duɗe ɗiɗi ɗo joɗnde mum ɗoo :
– Duɗal Keblorgal Jannginooɓe (DKJ) keblowal seernaaɓe fotɓe jannginde e duɗe fedde ndee. Loowdi heblo ngoo, ko ɓuri teeŋtude yowitii ko e karallaagal janngingol Taro e binndol e hiisa. Yantude e cellingol binndi e karallaagal kesal. Duɗal ngal ine waɗi 28 almuudo. Ine yaakoraa so heblo maɓɓe rewii laawol maa ɗum ustan fedde ndee caɗeele jannginooɓe he nder wuro Nuwaasoot.
Duɗal fannuuji (DF) keblowal almuɓɓe ɓee he nder fannuuji jaŋde : Taro, binndol, kuutoragol binndol, hiisa, cellingol binndi, ɓiyleydaagu, senaare. Ngalɗoo duɗal ine waɗi 37 almuudo. Ɓennuɓe e maggal fof payata ko to Duɗal Keblorgal jannginooɓe. Ñalnde aset 11 marse Fedde ndee yuɓɓinii yeewtere faatunde e eddaagu ɗo joɗnde mum ɗoo ngam heblude jiilirɗe cate jeegom fedde ndee gonɗe he Nuwaasoot.
Gila he lewru abriil 2022, fedde ndee woni ko e daɗɗude peeje no mahri Galle mum (3 600 m2) ɗoo he Nuwaasoot. Fuɗɗoraa ko pawe e nder fedde ndee, hade ɗaɓɓugol balle e daawal paangal.
Cosgol cate ɗiɗi kese
Caggal lappol pelle pinal nder leydi ndii e lewru sulyee 2022, fotde cate jeetati kese cosaama nder leydi ndii, goɗɗe ƴettii karte ngam sompude cate mum en. He lewru feebariyee fayi marse 2023 cate ɗiɗi kese cosaama :
- Catal Fedde Ɓamtaare pulaar he Muritani to Gural (sara Eeleega) lelnii yiilirde ɗowoore golle mum ñalnde aset 4/3/2023.
- Catal Fedde Ɓamtaare Pulaar he Muritani to Haayre Mbaar jooɗiima ñalnde 18 colte (feebariyee) 2023 ngam toɗɗade terɗe yiilirde mum caggal nde timmini 70 tergal. Ndeeɗoo yiilirde aroore toɗɗaama yo ardo catal ngal.
To bannge jokkorde pelle pinal tati ɗee (FƁPM, AMPLCS e APROLAWO) :
– Jokkorde ndee jokkondirii e hooreejo Duɗal ngam Ɓamtaare e Jaŋde Ɗemɗe Ngenndiije (IPELAN) ngam duwanaade ɗum e hollitde ɗum heɓaare mum wallitde kala ko ine moƴƴina heblo jaŋde e nder ɗemɗe ngenndiije ɗee. O hollitii kanko ne yaakaare makko e ballal pelle ɗee ngam yettinde donngal ngal o halfinaa ngal.
Fooyre Ɓamtaare
