ID (Initiative pour le Déɓeloppement) (ɓulno ngam Ɓamtaare) ine janngina sukaaɓe rewɓe e worɓe ɓe ndañaano janngude, walla woppuɓe duɗe law, mecce nay (4) to duɗal ngal inniri « Centre Vocationnel des Jeunes, Abdou Salaam Kismaa Tannjaa (CVJ – ASKT) » : Ñootol, moorol, Ganndee karalle kese, Kuɓɓam..
Fedde men Sifaa Hanki Pinal Hannde wiyi « sukaaɓe njanngee, sabu ko jaŋde tammbii ɓamtare. Kono kadi mawɓe njanngee, hay so a mawnii ne, jangude yawtaani ». So en nanii jaŋde noon, wonaa tan e nder duɗal. Janngude mecce ko jaŋde. Ene wiyee joom meccal aanataa, nde tawnoo nde ari fof maa taw ɗoon hatojimɓe e ko gollotoo koo.
Ene gasa tawa ɗuum ene jeyaa e ko saabii fedde men inniraande ID (Initiative pour le Déɓeloppement) (ɓulno ngam Ɓamtaare) yuɓɓinde heblooji mecce, wonande sukaaɓe rewɓe e worɓe, ɓe ndañaano janngude, walla woppuɓe duɗe law. Mecce nay (4) ene njanngee ɗoon e duɗal ngal ɓe nginniri « Centre Vocationnel des Jeunes, Abdou Salaam Kismaa Tannjaa (CVJ – ASKT) » : Ñootol, moorol, Ganndee karalle kese, Kuɓɓam.
Tawde noon ɓe ngoni ko e hebleede ngam waawde gollaade, ardiiɓe galle oo miijii, mbiyi alaa e sago ɓe mbaɗanee heblo suusnoowo ɓe haa, so tawuii ɓe ngasnii, ɓe pellitii liggaade, tawa kam ɓe ngalaa caɗeele. Ɗuum ene jeyaa e ko saabii juɓɓingol heblo tuggi 24 haa 27 lewru mee 2021, yiitiingo e ƴeestagol neɗɗaagal “Développement Personnel”. Doge ɗiɗi mbaɗaama ɗoon, tawi rogere heen fof ene waɗi hebleteeɓe 30.
Ene e ko ɓe nganndinaa, jannguɗo meccal haa ɗiggini, ene yiɗi golloraade, yo jooɗo miijoo, ɓeta mbaawkaaji mum, ɓeta ŋakkanɗe mum, yuurnoo fartaŋŋeeji taariiɗi ɗum, ɗo waawi dañde ko ene sukkira yolnde jogii, caggal ɗuum, teskoo caɗeele guuraaɗe, baawɗe falaade walla telɓinde golle makko. So ɗuum ɓennii noon, o toɓɓa faandaare makko, o waɗa eɓɓoore makko, o lelna ginol golle makko jowitiiɗe e ɗabboygol ngalu. Caggal ɗuum, ko tabitingol e ɓeto. Ene gasa ngarto-yen heen haa ɓura yaajde. Wasiya ndokkaten ɗoo tan ko “kala ko neɗɗo waawi, yo janngu ! Yanti heen ko hirjinde leñol ngol nde naatata e cosgol dente ɗe ngonaa laamuyankooje, mbele mballen sukaaɓe ɓee, mbele hakkillaji mumen njalta e yiɗde ɗannaade haa teeŋti e ɗanngal nguyka.
Malal Sammba GISE
