Fulɓe mbiyi “ ko sooynetenoo so saamii ina haani hoccee ! “
Hannde hoohooɓe fulɓe paamii ko dental woni nafoore, tawde noon laamɓe men, annduɓe men, alɗuɓe men ngummiima ngam daranaade leňol men, ittande ɗum caɗeele, mbaawaten ko yettude Alla no feewi, ko heewi.
Enen mbaawaten ko duwanaade ɓe, nde Alla semmbinta ɓe, ɓeyda ɓe cellal e baawal. Sabu kala daraja mo neɗɗo waawi tolnaade e himme mo waawi jogaade fof yonetaake duwaaw, yondintaako e ɗuum kadi. Haa teeŋti noon e ummanaade wuurtinde e wuurnude pulaagu, nguurngu hannde e jaakre e ngoƴa mawka.
Mbiyat-mi mawɓe fulɓe ɓee tan ko yo ɓe paam, wonde leňol mawngol weeɓaani warde, kono won no barminirtee, ɗuum ina waawi telɓinde ɓamtaare maggol ko juuti.
Ina haani paamen no haanirta nii, leƴƴi goɗɗi, koɗdaaɗi ɗii kadi e koye mumen, wonde haɓde e fulɓe ko leeltinde ɓamtaare Afrik, ɓamtude fulɓe kadi ko ɓamtude Afrik e ngootaagu mum.
Sabu ko fulɓe tan tawetee leñol koɗngol gila fuɗnaange haa hirnaange Afrik, koɗngol e nder reedu Saahal.
Dillinde fitina e nder reedu saahal, ko bonnude ndema, awo e ngaynaaka mbaɗetenooka e oon nokku ɗum jibina heege e leyɗeele men. Kono so ɓe ngokkaama jam, leyɗeele men maa nguur e neema, kaara, cella, nguura nguurndam moƴƴam, mbelɗam. Kono so ɓe caraama, ɓe caakaana, ɓe njaltinaama e ngenndiiji maɓɓe, alaa leňol e leƴƴi Afrik baawngol lomtaade ɓe e saahal, so wonaa tuubakooɓe, meerotooɓe heɓtude ɗee leyɗeele, mbaɗta remde e majje, e waɗde heen mbaylaandi ndemayankoori. Ngoo miijo Afriknaaɓe fof ina poti faamde ɗuum, ndaroo e salaade ɗuum.
Mi rowira wiyde hoohooɓe TPI fof nduwanaama, ňaaganaama Alla wune e fartaŋŋe e ko ndaranii Pulaar/Fulfulde e Pulaagu koo.
Ko ɗo Alla mballinto-ɗen to Arwannde e to Wattannde, yo O wallu en.
Shariif Aamadu Tijjaani KAN, winndiyanke, wiɗtiyanke.
