Hooreejo leydi Senegaal keso, Basiiru Jomaay Fay suɓiima yillaade Muritani, caggal nde o fiilaa lefol laamu. Muritani woni leydi ngadanndi ndi o adii yillaade. Ɗuum wonnoo ko alkamiis 18 seeɗto 2024. Jaɓɓii mo, boowal laaɗe diwooje Nuwaasot ko nanndo makko Muritani gardiiɗo « Union Africaine » Mohamed Seek Ghaswaani. Ko e oon sahaa hooreeɓe ɗiɗo ɓee e seteeji timmuɗi njaaɓani « Palais des Congrès ». Ɗuum ko adii ko ardiiɓe leyɗe ɗiɗi ɗee, yahde galle laamorgo Muritani. Faandaare nguu njillu, ko yeewtidde ko faati e kuutoragol eɓɓoore Gaas gonɗo to Ahmeyin keerol hakkunde Senegaal e Muritani, ndi njaanjeendi mum miilletee 120 km. Ndee toɓɓere jeyaa ko e toɓɓe yummaaje nde hooreeɓe ɗiɗo ɓee kaaltidi. Ko noon ne kadi, ine jeyaa heen kesɗitingol nanondiral jowitiingal e awo, ngal laamu Muritani siifondirnoo e leydi Senegaal hitaande yawtunde ndee, 14/7/2023. Rokkude fartaŋŋe Senegaaalnaaɓe awde nder maaje kaaɗɗe Muritani.
Yeewtere heeriinde waɗii hakkunde ardiiɓe ɗiɗo ɓee, to galle laamorgo. E sahaa yeewtere ndee to galle laamorgo hakkunde ardiiɓe leyɗe ɗiɗi ɗee, senngo awo heedaani heen caggal e ngal ɗoon gostondiral miijooji. Ɗee leyɗe ɗiɗi ciifondirii nanondiral awo e ciifanɗe ciinooje ngam weeɓtinde golle awooɓe Senegaal. Nanondiral awo ciifenoongal lewru jeeɗiɓuru 2023, teemedde joy laana ngawirka rokkaama faraŋŋe awde e diƴƴe Muritani.
Hooreeɓe ɗiɗo ɓee, njeewtidii pellital maɓɓe ɓesdude semmbe jotondiral e fannu awo maaje kaaɗɗe, nehngo jawdi, wiɗtooji ganndiwe (recherches scientifiques), rewindaade awooji ɗii, hisnude geej oo, horo cellal e ɗooftaade sariya awo ngoo. Kono kadi, hooreeɓe ɓee, njeewtidii doosiyee gaas mo Muritani e Senegaal ndenndi.
Ɓe kawrii e miijo ƴettude kuule jojjuɗi, ngam siinude e ɗooftaade pellitte nanondiral 25 ɗiɗiɓuru 2001 jowitiingal e awo e nehugol jawdi
Umar AlHajji Caam
Njillu Jomaay he Nuwaasot
